Eddie每年都會參加展覽，希望吸引來自世界各地的公司和他合作。 

創業通

B. Duck攻大陸　建立鴨仔王國

巨鴨遊香港成為近日 big hit話題， facebook日日洗版，全因鴨仔可愛，給人無限開心感覺。其實香港也有土生土長的 B. Duck，這隻黃色鴨仔同樣可愛，它由 Eddie設計， B. Duck產品於歐美及日本大受歡迎，近年更主攻大陸市場，十分受國內 fans歡迎，於國內共有 160個銷售點，生意額約 1億，成功建立鴨仔王國。

Aya SuzukiMotobayashi代表最初我 boss喺展覽會見到 B. Duck嘅產品，就向 Eddie攞貨返日本售賣，反應好好，我哋同 Eddie合作已經超過 10年。 

採訪當日，灣仔會展正舉行由香港貿易發展局主辦的香港禮品及贈品展，記者於入口已見到 5米高的 B. Duck布景板，令 Sëmk成為最搶眼的展位，而展位內放滿過百款 B. Duck產品，加上 Sëmk公司旗下的各款公仔產品，尤如一個童話王國。
B. Duck的夢幻色彩，可說是其成功之道，其生父是 Sëmk的老闆 Eddie，「我自細好鍾意沖涼鴨，鴨仔好有童真，啟發到我設計 B. Duck出嚟。」這隻土生土長的鴨仔憑着一臉傻氣，不單揚威歐洲和日本，近年更反攻香港及國內市場，現於香港擁有 7間分店，而國內約有 160個銷售點，主要分布在北京、上海、深圳，每年生意額約 1億，月賺約 7百萬。
Eddie說：「國內市場好大，單係一款 B. Duck產品，應付國內市場已經可以生產 30萬隻，多過成個歐洲向我哋攞貨嘅數量。」
Eddie正積極把 B. Duck轉變為潮流品牌，提升形象，「 B. Duck唔只係一件產品咁簡單，仲可以係潮流品牌，所以我哋推出 B. Duck系列嘅服飾，喺尖沙咀 The One開設專賣服飾嘅專門店。」為了令業務更多元化，除 B. Duck外， Sëmk推出不同系列產品，好像最新推出的 Doggi系列，便以柴犬、雪橇犬及鬥牛㹴為設計主題。

推出功能鴨仔產品

生意經說得頭頭是道，原來 Eddie是修讀設計出身，於 01年與 3位拍檔創立 Sëmk Product Company，並負責設計部分，「 02年見歐洲興番沖涼鴨，所以我用鴨仔嚟做設計，見市面沖涼鴨冇實際功能，於是我諗到出隻防水嘅沖涼鴨收音機，結果喺歐洲大受歡迎，喺 6年內，鴨仔收音機賣出超過 50萬隻。」
因反應非常好，把實用功能加入產品設計內，成為 Eddie的大方向，而產品亦只外銷至歐洲及日本等地。為了宣傳 B. Duck， Eddie每年都會參加展覽會，除外國客戶外，還吸引到香港公司找他合作生產禮品，如匯豐銀行、新鴻基及信和等。
於 05年時， Eddie決定回香港發展，「當時好多人以為 B. Duck係日本貨，有人喺日本買水貨返嚟賣，比原價貴成倍，啟發到我不如自己開門市。」產品有名氣，不難找到銷售點，包括吉之島、 LCX、一田百貨等。

B. Duck喇叭$358 

方形拉鏈錢包$288 

雖然 B. Duck設計大方向仍以實用性為主，為增加潮味，最近還推出 figure公仔系列，每個售$48。

投資設廠保持品質

為了保持產品的品質及貨量的彈性，同年 Eddie決定投資設廠，「我爸爸媽媽本身喺國內經營玩具廠，我最初都係搵佢哋生產，但我見玩具行業開始式微，工廠嘅生意額大減，我唔想佢哋辛苦，決定執咗間廠，再投資興建新廠房。」
Eddie自言當時設廠的決定尤如賭博，把之前出口所賺的 2千萬，投放於惠州大亞灣設廠，「好多公司都唔會諗開廠，因為投資太大，但我為咗增加生產嘅靈活性，由設計、生產，以至零售，可以做到一條龍服務，仲可以保證到產品嘅質素。好似有啲 B. Duck毛公仔，個嘴用軟膠，對眼用塑膠，如果冇自己廠造成本會好貴，我亦可以直接控制貨品質素，產品可以精細啲。」
自 06年起， Eddie察覺到大陸市場比歐、日更具發展潛力，所以決定進軍內地，「好多行家都知道國內有發展潛力，但都唔願意行出第一步，佢哋會擔心內地法制唔完善，反而我覺得要把握機會，盡快返內地發展。」

Sëmk旗下還有很多產品系列，如最新推出的 Doggi，以柴犬、雪橇和鬥牛㹴設計不同產品。Doggi錢箱每個$128 

國內經商從頭學起

返國內經營生意，有別於香港， Eddie說要從頭學起，「好似國內嘅內銷稅， B. Duck本身係做出口生意，某程度上係免咗部分稅，好似生產過程入面嘅零件同燃料等，但如果賣去國內就唔可以免呢份稅，而我花咗成年時間去學成個內銷稅系統，正所謂成功需苦幹，要付出先有收穫。」
於國內有不少分銷點，自設分店之餘，亦有在商場擺賣， Eddie指在內地商場擺賣的位置稱為購點，「每個購點都會有一個保底，商場會定最少要畀生意額嘅某個百分比作為租金，假設我每個月可做 10萬元生意，商場購點會抽 25%即 2.5萬作為租金，如果生意額不足 10萬，我都要畀 2.5萬；如果我做到 20萬，我就要畀 5萬，如此類推。」
最初返國內做零售 Eddie都有試過碰釘，「 07年我打算喺北京西直門開第一間鋪，但嗰陣唔熟悉內地嘅零售模式，俾人搵笨揀咗個租貴但人流少嘅鋪， 2年後蝕咗 40萬，諗番都肉痛；要喺國內商場租鋪要畀保證金，我之前喺一個大商場開鋪畀咗 20幾萬保證金，但𠵱家退咗租成 2年，仲未攞得番。亦有試過有客戶同我攞貨，冇找尾數，好在呢啲情況唔算多，惟有當做壞帳。」

Eddie授權給台灣一間公司，用 B. Duck的圖案來設計電單車頭盔，頭盔於香港專門店有售。$788 

B. Duck 20吋行李箱$688 

B. Duck在國內共有約 160個銷售點，包括在深圳萬象城內的分店。

Fans識分正貨老翻

國內老翻問題嚴重， Eddie表示對他影響不算太大，「唔介意就假嘅，但從另一方面睇，有人抄你嘅產品，先證明你成功，國內都有翻版問題，但𠵱家國內嘅人水平高咗唔少，佢哋鍾意得 B. Duck都唔會買翻版。好似我喺淘寶商場賣 B. Duck產品，有晒產品授權證書，即使淘寶網內有人賣老翻都唔會話自己係 B. Duck，只會話係黃色鴨仔，所以 fans嚟買嘢識得分邊啲係正貨。」
現在 B. Duck生意漸漸上軌道，全靠 Eddie懂得從失敗中學習。未來發展方向， Eddie希望將 Sëmk發展成日本的 Sanrio一樣， B. Duck尤如 Sanrio旗下的 Hello Kitty，「我希望 B. Duck有朝一日會好似 Hello kitty，可以授權畀世界各哋嘅公司，開發 B. Duck嘅產品，其實我哋𠵱家已經接到呢啲生意，好似我哋授權畀台灣一間公司，用 B. Duck嘅圖案嚟設計電單車頭盔，希望未來愈嚟愈多呢啲產品推出。」

Sëmk的香港 office設在屯門， Eddie現聘請了一個設計團隊，負責設計產品，慢慢由設計師的角色退下來。 

除了在惠州大亞灣設廠外，深圳亦設有 office。 

為了令 B. Duck成為潮流品牌， Eddie推出服裝，並在尖沙咀 The One商場開設專門店。 

B. Duck親子裝 tee童裝(黃)$299男裝(黑)$399女裝(白)$399 

開業成本

租金：$10,000
器材：$60,000
裝修：$150,000
雜費：$80,000
流動資金：$1,000,000
總投資：$1,300,000

每月收支

租金：$800,000(連香港及國內約 37間直營店)
人工：$1,800,000(190人)
雜費：$400,000
營業額：$10,000,000
盈利：$7,000,000

Sëmk
http://www.semk.net 

申請外觀註冊

B. Duck的創作靈感來自沖涼鴨仔， Eddie說要抄他的設計有一定難度，「 B. Duck嘅特徵有 bling bling眼、鴨嘴外形及頭頂尖位，而五官有一定比例嘅距離，我哋已經幫 B. Duck嘅外觀喺世界各地註冊咗認證。」
Eddie表示如果怕自己的設計被抄襲，可以到香港知識產權處申請外觀註冊，在香港申請單一外觀設計註冊的費用為$785及公告費$155。註冊外觀設計保護的有效期最長為 25年，每 5年續期一次。通常申請人在提交申請後 3個月內便可獲發註冊證明書。
外觀設計一經註冊，原創者便擁有該產品的外觀設計專有權利，任何人在營商過程或業務運作中未經原創者同意，在香港把該外觀設計用於相同或類似的物品上，即屬侵權，註冊外觀設計擁有人可就侵犯其外觀設計的行為提出民事訴訟。
在內地申請外觀註冊，可透過本地律師行及會計師行處理，每個設計的註冊費約$3,000到$4,500，需時約 12個月，有效期則需要每年續牌，最長為 10年。
查詢： http://www.ipd.gov.hk/chi/forms_fees/design.htm 

撰文：何倬然
攝影：彭自維
部分圖片由被訪者提供