女寵物培訓師阿 B表示，要成功訓練犬隻，首先要和牠們溝通，付出愛心關心牠們，才能得到好的效果。

Petbook

寵物培訓師用愛心馴服曳曳哥基

早前電視節目《演嘢》內，女寵物培訓師阿 B帶住 3隻哥基犬表演，狗仔聽話又醒目，贏盡掌聲，但原來狗仔以前全部有行為問題，當中旺財和阿 Dee最鍾意到處便溺、咬手咬腳，仲會甩繩四圍走，全靠主人阿 B付出愛心和耐性，才慢慢令狗仔變得聽話，並學懂表演各種花式，變得人見人愛！

阿 B曾帶愛犬上電視節目《演嘢》表演，圖中旺財示範推車仔。

「旺財…… go！」阿 B一聲令下，哥基犬旺財即跳上滑板上，靈活地踩板。轉頭，阿 B把一束假花放在另一犬隻阿 Dee口內咬住，阿 B行了一段距離，一叫阿 Dee，狗仔即乖乖跑到主人面前獻花，令在旁的記者忍不住大讚狗仔又乖又聽話。「佢以前好曳㗎，我 train咗佢 4個月先慢慢變乖咋！」
原來阿 Dee於 3年半前收養回來，「佢以前個主人知道我養咗 3隻哥基，就問我收唔收養埋佢，當時阿 Dee大約半歲，我唔收養佢會俾人遺棄，我就要咗先，打算再搵其他人收養。」
點知阿 Dee有好多行為問題，會不停咬自己手腳，咬甩晒啲毛，又會四圍屙尿，「同阿 Dee出街，佢行 4、 5步就屙幾滴尿，佢個地盤意識好強。」即使訪問當日，只係行咗兩個街口，阿 Dee都便便了 4次，「佢𠵱家已經比以前好咗好多。」

先建立感情後訓練

見阿 Dee有問題，阿 B決定 train好狗仔後，先給其他人收養，於是日日陪狗仔玩、行街街培養感情，再逐步訓練牠各項指令，「我哋教狗好似教小朋友咁，首先要佢哋溝通、建立感情，了解佢哋嘅性格，教佢哋時唔可以太縱、又唔可以太惡；同埋要有適當嘅賞罰，好似做得好時就畀零食，唔好就要話佢、鬧吓佢。」
以前阿 Dee出街一定要拖繩，試過幾次差點走失，但 4個月後，阿 Dee開始有改善，而且好黐阿 B，令到阿 B不捨得送牠給其他人，「當時我已經養咗 3隻哥基，諗住再養就揀其他品種，但同阿 Dee有咗感情，覺得佢好聰明、得意，決定養埋佢。」

獻花阿 B叫阿 Dee咬住一束假花，並行開一段距離，她一叫阿 Dee，狗仔即乖乖跑到主人面前獻花。

踩板阿 B一聲令下，旺財即跳上滑板，靈活地踩板。

為旺財學寵物培訓

阿 B最初學做寵物培訓，源於 9年前養的第一隻愛犬旺財，「我家姐喺澳洲養咗隻哥基，成日畀相我睇，真係好得意，之後去寵物店買咗旺財。」旺財外表雖可愛，但好曳曳，常常四圍便溺，更試過將沾滿便便的報紙，放在阿 B床上並咬碎，搞到張床極度污糟。「個情景太恐怖，真係有諗過唔要佢。」
最終阿 B為了愛犬，買書及上網自學教狗，又跟師傅學了 1年，漸漸對寵物培訓產生興趣，繼而入行。「幫過好多客教狗，既係教狗、又要教主人點同寵物相處，最難忘係有隻哥基一情緒不穩就會咬女主人，咬到流晒血，我首先教主人，如果狗仔開始情緒不穩就匿埋，避開佢先；教咗一排，𠵱家終於唔再咬人，每次見到狗仔變番乖，都好有滿足感。」

氣味搜尋旺財仲識得氣味搜尋，聞過一次的物品就可以於不同盒內找出來。

跳圈阿 B讚阿 Dee學嘢快，跳圈學幾次已識。