愈講得出圖中機械人名字，愈足以證明你的年紀…… 

玩物壯志

那些年的懷舊玩具

自黃色膠鴨現身青衣海旁，未入城，已經吸引大班 fans撲去朝聖，出動長短鏡頭影餐飽， Facebook上更有大量 post報告「每日鴨蹤」，直至上星期，終於去到尖沙咀，一如所料，萬人空巷。
查實，黃色膠鴨威力驚人，全因設計跟足細個沖涼時玩的玩具鴨，捉正你同我份懷舊情意結，諗番細個玩玩具的日子。
之不過當年的兒時玩具，今時今日已變收藏家之物，有名有姓，例如各種日本機械人，當然大把人高價搶住要，就算無名無姓的港產玩具，一樣得有心人收藏，儲起的，只為那份香港懷舊情懷。

乘潮而起

港譯宇宙飛龍的大空魔龍，長達兩呎， Raymond指當年買入價只是二萬幾元，今日已經跳升幾倍。 

七十年代，日本文化開始席捲香港，年輕一代追睇日本卡通片及由真人演出的「特撮片」（尤其以機械人當主角的），更是男仔指定動作，鐵甲萬能俠、三一萬能俠、天地雙龍等的當紅程度，直逼天王巨星。
粉絲多，自然要出埋相關玩具「平息民憤」，當年正值塑膠工業興起，於是俗稱「大膠」的塑膠製機械人應運而生，「最早的大膠，是一九七三年由 Popy（即 Bandai前身）生產，第一款係鐵甲萬能俠，身高有成二十吋，拎上手夠晒霸氣，加上機械人造型，迷死唔少細路。」現時身為收藏家兼玩具店老闆的 Raymond，當年亦只是𡃁仔一名，只能眼看手勿動，但今時今日已經儲埋近半百隻大膠，隻隻都有價有市，「當時賣幾百蚊一隻，等於成個月人工，點會捨得，直到一九九三年先買到第一隻鐵甲萬能俠，當時只係二千幾蚊，點估到而家升到成萬幾蚊！」

量少價升

連盒大膠價值比起「無盒版」高三至四成，這幾塊紙皮，好值錢。 

塑膠被視為廉價物，但大膠之所以矜貴，皆因產量少之餘，款式亦寥寥可數，就算產量最多的 Popy，前後合共亦只推出 51款大膠，當中例如鐵人 28、三一萬能俠、超力電磁俠、 V形電磁俠及六神合體等港童熟悉的機械人。雖然之後都有其他廠商如 Takara、 Shogun等出產，不過論可玩性、質素及品牌名氣，都以 Popy出品最多收藏家俾 Like。

三招入手

Raymond是個「愛車之人」，玩大膠之餘，亦收埋不少七十年代質感十足鐵皮車。 

要搵個「靚仔」大膠，除了考眼光、講經驗，仲要計算運氣同毅力，「入貨多數靠三個途徑：網站、玩具鋪同玩具展拍賣。網站首選自然係日本 Yahoo!拍賣，其次日本 eBay，好多時都有驚喜，不過唔識日文就比較麻煩；玩具鋪係指日本當地的懷舊玩具鋪，以前未有互聯網，去到當地買本玩具書，靠書內廣告逐間搵，今時今日玩具鋪都有網站，方便好多；最後係拍賣，即係日本舉行的玩具拍賣，不過要有行內人帶先入到。」

保值秘笈

Raymond指新淨、齊配件兼有盒，價錢隨時貴三至四成，所以揀質素一般，但齊配件同有盒，已經好值得入手。「當年用三萬幾蚊買的《太寶郎》大膠，已經升值近十萬蚊。其次揀香港曾經有播放過的劇集，例如天地雙龍、鐵甲萬能俠及超力電磁俠等，通常就較多人搵，售價亦較高。」不過 Raymond眼見近年大膠愈炒愈貴，已經大幅減少入貨，反而惜貨而沽，留番俾自己慢慢玩。保養方面， Raymond話平時用水抹，避免陽光直曬就已經可以 keep得好靚仔。

今日膠價

當年今日的大膠玩具，幾十年後，身價已經三級跳，一於搵來幾件七八十後熟悉的大膠，俾番個參考價大家睇睇。

六神合體
不單只雙拳可發射，更可打開機身放入主角李大龍，加上無復刻版「拖低大市」，既玩得又保值。
參考價：$20,000至$25,000

鐵甲萬能俠一號
人氣度堪稱眾大膠之冠，兼且是 Popy首款推出的大膠，雖然之後 Unifive推出過復刻版，不過質素依然以 Popy較佳。
參考價：$10,000至$15,000

鐵人 28
漫畫誕生超過五十年，上個月依然有新版短篇動畫推出，證明大把粉絲，多年來亦只此一膠，大有升值潛力。
參考價：$15,000至$20,000

大膠藏家

九十年代開始儲大膠的 Raymond，本是模型車迷，迷到要登報登雜誌徵求靚車，後來踩過界儲埋大膠，玩得同樣瘋狂，上網買之餘，更飛到日本搜尋偏遠懷舊玩具鋪，最彪炳戰績是一口氣狂掃八個大膠返香港。平時錫住班大膠，通常都收埋，今次為影相破天荒拎出半百隻大膠晒冷，連他都話好少機會如此齊齊整整。

本土情懷

鍾燕齊話其實九成半玩具都無玩過，所以名副其實收藏家，齋收藏。 

睇住手上玩具身價愈升愈有，當然開心，但儲玩具未必只向錢看，任職策展人的鍾燕齊，所儲的玩具，多到需要租三個倉先夠擺，不過，就連一個玩具名都講不出，因為他所儲的玩具，全都是幾十年前的懷舊玩具。「香港五十年代開始已經生產玩具，甚至曾經係全球最大玩具輸出地方，可惜想要搵件出名嘅玩具，一件都無。」儲懷舊玩具，旨在搵番香港本土玩具發展史。

近期興鴨仔，鍾燕齊即刻搵番幾隻鴨仔應景，右邊的鴨仔更出自未有塑膠的五十年代，採用玳瑁（手感類似乒乓波）製成，中間的先至是塑膠製品。 

其實鍾燕齊同好多香港男士一樣，自細鍾意日本動漫，甚至飛到日本留學，誓要儲勻日本玩具，當時試過靠買賣大膠，賺取生活費。後來俾日本玩具大師北原照久點醒，認為要儲，就要儲自家文化，於是回港後，拎住本地圖，逐條街逐間文具鋪搵，你無睇錯，的確是文具鋪，「舊式文具鋪會賣埋玩具，去舊式文具鋪搵，收穫就最豐富。」後期連元寶蠟燭鋪、舊屋邨、舊街市都搵勻。

大手入貨

要成功刮盡舊鋪珍藏，鍾燕齊個個星期都要巡鋪，「舊鋪擺得太雜亂，去一次唔會買得晒，每次去都有新發現，遇上大型重建或者鋪頭執笠，仲會一車車咁搬，只要係香港生產嘅玩具都會買。」因工作關係，鍾燕齊經常同不同機構搞玩具展，「所以每次買玩具，都係掃倉式咁買，因為搞展覽會有損毀，好多爛咗就買唔番，所以有幾多買幾多。」

整間辦公室擺設都相當懷舊，連裝玩具的玻璃樽，都是取自舊鋪。 

儲玩具只問國籍不問種類，無論公仔、汽車定機械人，鍾燕齊一律通殺。 

撰文：劉耀祥
攝影：陳健邦