墨西哥漢堡（前）$18、水牛城漢堡（後）$18墨西哥漢堡食落一陣辣勁緩緩湧上，惹味！蜜糖芥末醬用上本地百花蜜，味道偏甜，小朋友也愛吃。 

庶民飯堂

即做穀飼牛漢堡 味口福 

我愛吃漢堡，連鎖店夠平，但味道千篇一律，好厭。貴價漢堡，動輒百幾元一個，又承受不了荷包壓力。要平又要有特色，真的如此難求？四月底在西灣河開業的平價漢堡店味口福，主打漢堡、熱狗，定價$18至$23，卻採用澳洲穀飼牛。十幾蚊食到靚牛肉，好多街坊首日開張來排隊，二百個漢堡六小時售罄，反應熱烈。

味口福的老闆之一是經驗大廚 Edwin，他入行三十年，做過食品採購和買手。「我用穀飼牛的牛柳頭部位做漢堡肉，肉質嫩滑富彈性，口感較好。」他還在肉中加入小量蘑菇、洋葱等蔬菜，令漢堡扒食落清爽而不膩。另一賣點是醬汁，招牌水牛城漢堡和墨西哥漢堡，分別使用蜜糖芥末醬和墨西哥辣醬，前者用檸檬汁、蜂蜜及英式芥末醬等按比例調製，後者混合兩種辣椒、自製茄醬及墨西哥辣汁，辣得來酸酸甜甜，豐富有層次。兩種醬汁都是 Edwin自創，他認為平價漢堡一樣可以有個性，只在乎烹調的人花多少心思和堅持。

魚柳包$18炸得金黃的法國龍脷柳，肉質鮮嫩。包身鬆軟，富有麵包香，是老闆找麵包店每日製作，不含防腐劇，不會留隔夜。 

客人柯打後即做，師傅一次過可煎四塊漢堡扒，每件約重三至四安士。 

焗豬扒飯$38即叫即焗，分量十足。選用台灣珍珠米，焗出來的米粒飽滿挺身。醃製過的豬扒逐塊用人手打鬆，夠嫩滑，只略嫌薄身。

味口福
地址：西灣河筲箕灣道 57-87號太安樓地下 A31號鋪
電話：從缺
營業時間： 12nn-10pm
泊車：太康街咪錶位$8/小時

撰文：鄭鳳
攝影：陳偉傑