陳少華同郭志一手上嘅綠洲龍躉已經有十幾斤重，佢哋話養到三、四十斤都冇問題，等市場缺貨先拎出去賣都仲得。 

CLOSE-UP

新世紀農夫

食菜驚有農藥，食雞同大閘蟹驚有雌激素，食豬又怕食到哮喘豬，樣樣食物都有毒，令人提心吊膽。
防止出事，有人化身現代農夫，落手落腳養魚種菜，靠科技幫手監控，全程冇化學劑及農藥添加，確保食得健康。

室內養「龍」

喺魚排養海魚，紅潮、重金屬等問題年年都有，加上打風落雨，令到收穫大減，要有效保持品質，亞洲水產養殖科技就諗到室內養殖花尾龍躉，仲起個名叫「綠洲龍躉」。以為喺室內養食用海魚同喺屋企養珊瑚魚一樣？其實學問更多，真係少啲心機都唔得。

想龍躉運動量充足，就要靠水泵噴水加快缸內流速，而且廿四小時從不間斷，先可以「修身」成功。 

喺台灣引入魚苗，同時喺魚場入面（超過廿個魚缸）慢慢培養，保證供貨穩定兼冇污染。 

自製鹽水

室內養海魚要做到人工控制下模擬到海入面嘅生態環境，科技好重要，亞洲水產養殖科技董事陳少華就話，要成品睇得又食得，一定要由水質、運動量同飼料三方面入手，「由於香港海水嘅含菌量高又可能有重金屬，所以養殖場入面嘅水要用清水加科學鹽重新調配，亦要加個大型過濾器將多餘蛋白質同糞便清走，保證水質乾淨又可以循環再用。另外，為解決運動量問題，要用水泵令缸入面嘅水流速度提高到每小時兩公里，令到龍躉有充足運動量；仲要特別調配食糧，等啲魚嘅脂肪可以溶入魚肉入面，質素先比得上野生龍躉。」即場拎條兩斤重嘅龍躉去附近酒家加工俾記者試食，肉質肥美結實，而且魚皮仲有豐富膠質，唔似其他養魚咁，肉質鬆散兼成嚿脂肪喺肚腩。

初初推出綠洲龍躉，為求可以「上得大枱」，特別搵咗唯靈、劉晉等食家試食。 

綠洲龍躉最大特點係皮厚而肉滑，兩斤重大約賣五百蚊條，價錢平之餘，勝在供貨夠穩定。 

專攻缺口

運用到大量科技，成本自然高，不過亞洲水產養殖科技董事郭志一就話，室內龍躉極具生存價值，「一條兩斤重嘅龍躉大約賣五百蚊，比起一條三斤重就要八百蚊嘅野生龍躉都仲算平，而且市場好少兩斤重嘅龍躉賣，淨做婚宴酒店都大把生意。」

寶石魚

有機寶石魚每條售價約$98（約 1斤重） 

除咗「綠洲龍躉」，有機寶石魚亦係本地產物，位於元朗西北濕地嘅楊氏水產，以有機方式飼養寶石魚，從台灣引入水產養殖科技，不單可以有效監控水質，調節魚塘鹽度以提高魚嘅肉質味道，仲特別同中文大學海洋科技研究中心合作，研發專為寶石魚而設嘅專用飼料配方。

環保循環水

成個室內養魚最環保嘅地方，就係用一套高科技過濾系統，等啲鹽水可以不停循環再用，只要加番清水補番蒸發咗嘅水分就得。

Step 1

魚缸入面嘅水分為底水（含糞便同硬物）同面水（含多餘蛋白質及尿素）兩部分。先由缸底抽走底水去到大型分離機，利用離心力將大型污物同鹽水分離，再將分離後嘅鹽水放番入魚缸。

Step 2

從水面抽走面水到蛋白分離器，泵入大量空氣，令到水入面嘅孱同尿素依附喺氣泡表面，然後抽走氣泡。

Step 3

經過蛋白分離器後嘅水，會流經生物球過濾器，利用生物球上面嘅益菌，將更細微生物清除。

Step 4

清理完微生物之後，鹽水仲要去曬一曬紫外燈進行多一次殺菌，仲要加番小量氯氣，之後再泵番入魚缸不停循環再用。

發光驗毒

養魚有時未必用嚟食，但一樣可以幫我哋檢測食物安全，背後當然要靠科技幫手。撞正近年化妝品同埋食物愈嚟愈多雌激素，危害人類健康，水中銀生物科技利用基因改造技術，將熒光因子注入鯖鏘魚體內，遇到雌激素會發光，變成「發光魚」，一睇就知雌激素有幾多，價錢平又快手。

經電子顯微鏡放大，先睇到魚身有冇發光。 

陳子翔話所有測試全靠呢批成年鯖鏘魚，所以一定要好好保護，攝影師想影佢同啲魚嘅合照，亦唔准開閃光燈，驚嚇親「米飯班主」。 

鯖鏘魚繁殖速度極快，一胎可以生好多魚苗，而且每年有六個月時間可以繁殖，大大減低養殖成本。 

徐淑敏代理嘅 SÈ VE係首個用「發光魚」做測試嘅本地化妝品品牌，水中銀生物科技創辦人陳子翔話將會有更多品牌採用佢哋嘅測試方法。 

本地認證

上星期藝人徐淑敏開記者會，力 sell自家化妝品品牌 SÈ VE，話明產品絕冇雌激素，就係用「發光魚」做測試。水中銀生物科技創辦人陳子翔話，近年多咗本地機構採用，「香港標準及檢定中心喺上個月同我哋搞咗個『雌激素安全』認證標誌，正式採用發光魚嚟測試食物同埋化妝品有冇雌激素，之前已經有好多歐美國家嘅一線品牌，包括藥廠同埋化妝品製造商，用我哋嘅方法嚟做測試，比傳統化學檢測平六成，而且準確度高好多。」
測試方法好簡單，將測試樣本攪拌成液體，同轉咗基因嘅鯖鏘魚苗一齊倒入測試皿，等廿四小時，魚就會「着燈」，放到電子顯微鏡下，透過電腦軟件分析，就知樣本中雌激素有幾高，「鯖鏘魚對周邊環境好敏感，對污染物嘅敏感度，更加係人類嘅十倍，養佢哋要好嚴謹，對光照、溫度同埋飼料都有一定嘅要求，好似前嗰排雅安地震，佢哋有幾日唔肯產卵，冇魚苗就做唔到測試，所以要確保啲魚活得健康快樂，先至可以做好測試。」

斑馬魚測水質

斑馬魚平均壽命只得一年，每條成年斑馬魚「睇水」一個月後就要退役。（《蘋果日報》圖片） 

唔單只發光魚，最近水務署就引入「生物感應預警系統」，將斑馬魚放入盛載東江水嘅魚缸中，由於斑馬魚對水中污染物有高度敏感反應，只要佢哋活動靜止、突然急速游動或死亡，就代表水質出現問題，用佢哋嚟全天候監察東江水水質有冇受污染，成本只需$50，又唔使用到化學品，大幅減低對化驗嘅需求。

環保種菜

養魚學問多，種菜亦唔見得簡單。近年興喺市區搵天台種菜，唔使走入新界咁遠，收工去淋水施肥，有收成就摘返屋企煮嚟食，確保冇農藥又新鮮。如果再加太陽板同埋風車，直情可以靠陽光同埋風力發電，定時定候自動灑水，打理嘅時間都慳番。

太陽能發電

要打造全自動嘅空中花園， Well Green綠色工程負責人謝家威話唔係好複雜，「十塊太陽能板加兩架風車，天氣好嘅時候，一日就儲到 800W電力，已經夠電俾灑水系統用三日。傳統灑水系統會喺菜盆頂加水管，用水龍頭噴射，但係呢個方法命中率低好嘥水，亦會搞到成地水，我哋就改良咗，將水管放喺菜盆兩邊，校準力度向中間噴水；有啲蔬菜唔使直接灑水嘅，仲可以轉用泥下引水嘅方法，確保唔會浪費食水，更環保。」

幾塊太陽能板（右）加兩架風車（上）， Well Green綠色工程負責人謝家威話已足夠推動自動灑水系統。 

無菌水耕

嫌灑水麻煩，不妨轉用水耕，喺古洞開設水耕農場嘅 James就話水耕好處多，「去過美加、瑞士、荷蘭、韓國等廿六個國家，睇過接近二百個農場，發現水耕係最好嘅方法，可以減少蔬菜由泥土沾染細菌嘅機會，更乾淨衞生。」話明係水耕菜，水當然係靈魂， James特別花錢起四座濾水器，所有水都經過四重過濾，再經紫外光消毒殺菌，「濾水器入面放咗十多種礦物石，潔淨食水之餘，仲可以將礦物嘅營養加到水中，俾蔬菜吸收。」

起初 James用水耕只種外國菜，而家試種埋白菜、菜心、芥蘭等本地菜，遲些仲會種人參。 

水管放喺蔬菜盆兩邊，底部嘅鋅盤仲可以回收番灑唔中菜盆嘅水，循環再用。 

政府示範

水耕中心喺長沙灣工廈入面，蔬菜統營處希望用嚟做示範，等其他有興趣搞水耕菜嘅可以跟住嚟做。 

蔬菜統營處斥資 650萬元設立全港首間「全環控水耕研發中心」，去年底正式運作，成為全港首間喺工廠大廈入面嘅室內菜場，內有大量儀器，幫手調節溫度、濕度、光照、營養、氧氣及二氧化碳量，令蔬菜可以喺接近天然嘅環境長大，但又唔使怕風吹雨打。中心採用高效慳電嘅植物生長燈，配合埋營養液循環及空氣淨化系統，種植五種沙律菜苗（水菜、芝麻菜、橡葉生菜、紅芥菜同埋如月菜），每日最少出產 30kg，過程毋須落農藥，純靠營養液令蔬菜長大，保證安全。

無痛種植

講到水耕咁多好處，其實可以親手做，只需要定期換水施肥，就可以種出收成，方便到喺 office種都得，返工種，放工摘返屋企就有得食。

種菜 DIY

網上有得賣蔬果盆栽 DIY套裝，原理類似水耕種植，搵個舊水樽裝滿水就種得。仲有好多品種選擇，包括香草、檸檬葉、車厘茄同埋野草莓，種出收成可以即摘即食。

Step 1先用清水浸濕培養器內嘅棉花，然後喺水樽注入約七成清水，再將培養器擰實。 

Step 2放 1至 3粒種子喺濕棉花上面，切忌貪多放晒成包，咁做只會阻礙生長。等到種子發芽後，將隨培養器附送嘅泥土，覆蓋種子表面，大功告成。 

Step 3記得每個禮拜更換膠樽內清水，換水後，仲要喺水入面放入肥料，確保有足夠養分。

日常打理

基本上，呢類水種植物唔使特別打理，只須確保樽內有七成水就得，若想植物生長得更茂盛，就要將盆栽放在窗邊或光線足夠的地方，三至四個禮拜後，就會有收成。

蔬果盆栽培養器（連種子、肥料）售價：$68網址： http://www.81net.hk 

城市試耕
天台農莊

天台農莊不單綠化環境，仲可以為大廈降溫，所以近年極受都市人歡迎。 

除咗喺辦公室養魚種花外，仲可以幫襯喺荔枝角、觀塘同葵涌等工廈天台嘅天台農莊，親手種植蔬果等有機植物。費用方面，按租用土地嘅尺寸而定，一般 90× 60cm嘅園圃，月租大約$150，仲包埋種子同有人幫手淋花施肥。
不過，梁永鏗律師提醒，喺天台種植雖然唔受法例監管，但礙於消防條例，農莊須提供有效走火通道，以及做好去水措施。如果起埋溫室或者加建放置農具嘅雜物房，事先要到屋宇署申請，否則會涉嫌僭建。

公園種植場

康文署「社區園圃計劃」選址鄰近民居，極方便打理農作物。 

想進一步感受耕種樂趣，可以參加由康文署舉辦嘅「社區園圃計劃」，活動以種植研習班形式進行，喺各區公園或樹木庫內，特別劃出一幅面積約兩米乘兩米嘅園圃，喺合資格導師指導下學種蔬果，參加者可自行打理所屬園圃或由管理人員代為澆水。每班為期約四個月，名額最多五十個，費用$400。
網址： http://www.lcsd.gov.hk/green/garden 

只要在 Facebook以「 NEXT 3.0」為關鍵詞搜尋，或以手機的「 QR code」 app掃描，就可以睇到更多新聞同產品情報。

全球玩水

水耕已經係全球大趨勢，香港只係起步階段，想知道水耕仲有咩玩法？
即睇！

多層農場

向高空發展，絕對係水耕最大優點。 

用得水耕方法耕種，無非想慳地方，最理想係地方細細，等幾日就有收成。加拿大方面更加地盡其用，喺溫哥華一個停車場天台，建造北美首個多層垂直水耕農場，只需 560平方米面積，用廿日左右，已經種出六萬八千公斤蔬果。
網址： http://www.localgarden.com 

反攻公園

諗到將水耕變成景點，點到你唔服。 

水耕原意係想走入城市，隨時隨地都種得，估唔到連迪士尼都玩埋一份。講緊係位於美國奧蘭多嘅 Disneyland，用水耕方法種植園內植物，只要俾 US$18（約$140港元）就可以參加園內嘅 Behind the Seeds Tour，睇到整個水耕過程。
網址： http://disneyworld.disney.go.com 

自家水耕

設有四種 size，圖中為最大嘅 AeroGarden Ultra（ 85× 35.5cm），售 US$250（約$1,950）。 

想喺屋企玩水耕，除咗跟足前面嘅 DIY方法，仲可以考慮幫襯呢套由美國 AeroGarden推出嘅座枱式水耕盆栽，設有照明系統，按指示注入水同營養液，就會快高長大，勝在有 LCD屏幕顯示狀態，提你淋花施肥，夠 hi-tech。
網址： http://www.aerogarden.com 

動物受惠

連食都咁講究，做動物都幸福過人。 

水耕唔單只造福人類，連動物都受惠。美國 FarmTek將水耕方式應用喺種植餵飼用食草，整個水耕系統多達六至八層，只需一日，就可以種出新鮮嘅餵飼用食草，動物有靚草食之餘，又唔使用咁多地方種草。
網址： http://www.foddersystems.com 

text：科技組
photo：吳超德、陳健邦