避風塘炒蟹$20-$25/兩鹹味搶過蒜香，最大問題係蟹肉被油泡得太乾，似炸過一樣，我們失望的同時，隔籬枱國內客人讚好吃。因為佢隻蟹細啲冇失手？定係大家期望有落差？ 

試食王

避風塘炒蟹　愛靚唔愛味

由避風塘船上檔、到謝斐道擺街邊、然後入鋪、再去國內開分店，喜記賣炒蟹賣到出晒名有聲有色，佩服。啱啱再開新分店，從舊鋪轉個彎就到，但走高檔次路線，豪裝五星中菜館格調，作為最新旗艦店，嘩，聽到都興奮，即刻去試。

未入門口已經感到高級餐廳的細心，帶位的小姐一句落雨小心地滑、小心梯級、小心碰頭，十秒之內溫馨提示四五句，超有禮。入到鋪，空間非常寬敞，不只座位放得疏落，枱 size本身也特大，坐得落六至八人的圓枱作四位用，不似其他中菜館，叫多兩碟餸都唔夠位放。長魚缸、酒櫃、雲石地板、拱形梳化位，比很多酒店中菜廳更豪，舒服到一個地步是啱 BB去的，同場亦真係有不少家長帶埋細路仔幫襯。

新店以紅襯黑，中間放個魚缸，另一邊又有酒櫃，枱櫈亦放得疏落，似酒店中菜館。 

格調舒適，自然對食物有所期望。侍應送上幾款餐牌，四百有找的二人餐、任點任食、叫蟹送小菜等等，都是其他分店的類似優惠，較特別是新菜，冰鎮蟶子、蟹將軍沙律等，侍應亦清楚介紹菜式做法，抵讚。到目前為止都很滿意，直至菜式上桌。冰鎮蟶子和冰鎮賴尿蝦的賣相麻麻，和高檔 style格格不入，沒有碎冰鎮着上碟，都算，只是食物溫度不夠涼，沒有冰鎮清爽涼快的效果。海鮮冷盤當然要食其鮮味，可惜這兩道冰鎮菜，被乾葱加醋等調成的醬汁蓋過鮮味，我望着我最愛吃的賴尿蝦，埋怨自己叫錯餸。似凱撒沙律的蟹將軍沙律算有新意，酸酸甜甜似日式沙律汁，不算很出色，勝在清爽開胃。到後來主角避風塘炒蟹上枱，走油走得過火的蟹肉過分乾身，調味鹹得甚至蓋過蒜香，邊吃，邊要吃沙律平衡一下。朋友拋來一句︰你寧願揀食物超好吃但坐得辛苦，定係坐梳化好舒服但係食物麻麻？可惜時光不會倒流，我冇得揀當年避風塘風味。只希望喜記擴充升級的同時，揸緊食物質素。始終，避風塘炒蟹是香港人記憶一部分，而香港人對食海鮮又特別挑剔，水準要回復穩定，才不會淪為遊客餐廳呀。

冰鎮賴尿蝦$280用上冰鎮蟶子同樣的醬汁，變成一樣味道，以此價錢來說，我期望鮮甜飽滿的質素。 

蟹將軍沙律$98新鮮沙律菜伴以蟹肉、蟹籽及蟹油，可惜蟹肉似蟹柳，亦吃不到蟹油香，似普通日式沙律。 

冰鎮蟶子$45/隻蟶子王 size不算很大，肉質夠爽，但醬汁味蓋過鮮味。 

蟹肉春卷$20/條餐牌寫每條$20，埋單卻收$10/條。鮮蟹肉餡撈了沙律醬，炸得不油膩。 

評分

食物：★★ 1/2
服務：★★★★
環境：★★★★
抵食：★★★

喜記蟹將軍
地址︰銅鑼灣謝斐道 440號地下及地庫
電話︰ 2575 7565

試食王

喜歡外出用膳，也喜歡誠實，不相信飲食網站的所謂評分，也怕了所謂食家獲得優待後的意見，情願隱姓埋名，真金白銀，測試飲食雜誌飲食網頁捕捉不到的真實一面。

超抵晚餐賀一周年

去過紅磡海名軒三間高級餐廳未？懷石料理岡田和生、高檔意菜 Messina、米芝蓮一星中菜玉蕾，於 5月 15日一歲生日，推出$515晚餐。比散叫平一截，一樣可以食到招牌菜，例如六道菜懷石料理包括煙熏三文魚、江戶前壽司；五道菜西西里海鮮有香煎地中海紅衫魚；中菜更有北京片皮鴨、番辣汁魚茄子盅等七道菜。消費滿一千元即送餐券、酒或烹飪班名額等等禮物一份，必試！

供應日期： 5月 15至 31日晚市
地址︰紅磡環海街 11號海名軒 5樓
岡田和生營業時間：星期二至日 6pm-11pm
電話︰ 3746 2722
玉蕾營業時間：星期二至日 6pm-11pm
電話： 3746 2788
Messina營業時間：星期二至日 6pm-10:30pm
電話： 3746 2733

限時品嘗杭州名菜

龍井問茶$288 

想食正宗杭州菜的請留意，帝苑軒將邀請杭州名店張生記的十二名廚師來港，行政總廚韓毓敏師傅和團隊一齊親自炮製杭州招牌菜，包括老鴨煲、紅梅含瑞（糯米釀紅棗）、鹹菜麵疙瘩、玫瑰細沙南瓜餅等，前菜、湯羮、主菜、點心甜品共超過五十道菜，選擇豐富。

供應日期： 5月 17日至 6月 6日
地址：尖東麼地道 69號帝苑酒店 B2層
電話： 2724 2666
營業時間：
星期一至六 11:30am-3pm， 6pm-11pm
星期日及假期 10am-3pm， 6pm-11pm