中環人無論實際需要或單純為追潮流，換手機的頻率極高，每逢午飯或收工時段，手機收購檔口都圍滿了白領麗人，一日可以回收十多部智能手機。 

城市脈搏

非比尋常　回收電話檔

手機回收檔布置簡單：一張摺櫈，一張寫着「高價收購」的紙牌，再加一個由朝坐到晚的人。
在旺角、中環、銅鑼灣，好似便利店一樣，梗有一檔喺左近，不但市民習以為常，連警察、食環署人員都懶理他們阻街。
不過原來這些回收電話檔，殊不簡單。
每區每條街各個檔口，都由幕後老闆操控。老闆除了要派人運送巨額現金到各檔口，保證充足現金流，又要落場到各區打點關係，妥善安排勢力和檔口分布。
下線亦分工仔細，前線收機，要懂得全方位 QC驗貨，收貨之後，有專人負責物流（運返大陸），亦有人到手機專門店，用靈巧呃騙方法，壞機換新機；更有人專門做市場調查，緊貼市場新機及價格。
這門尋常街邊生意，比得上企業營運，絕不尋常。

幕後平頭裝老闆每星期會拖着喼到旗下收買佬檔口巡視業務，及驗收收購回來的電話。 

香港是世界手機最普及的地方，去年統計，每個港人平均擁有二點六部手機，而智能手機大行其道， Samsung（三星）每季總有一至兩款新智能手機推出，更激化港人換機潮，加上蘋果 iPhone系列的追隨者，換機如時裝換季，而香港人最常用的換機方法，是在街頭搵手機回收佬。

中環收入最肥

入行兩年多的「手機收買佬」阿昌表示，現時除了偏遠區域例如新界及元朗等地，是有人以個體戶形式開檔收手機外，港島九龍旺區的回收檔，都是由幾家人壟斷，每家檔口更有識別的「公司標記」。
「旺角行人專用區一條西洋菜街成十檔，一律採用巨型黃色的街頭招牌作招徠；而在中環戲院里和皇后大道中附近兩三檔，就會用 iPhone手機機盒玩『層層疊』，看似是獨特招牌，其實是話俾啲行家知，切勿入侵！」阿昌說：「全香港來來去去都係嗰幾個老細做，旺角夠密集，都係一個老細，深水埗夠雜，乜機都收，同最肥最高貴的（最好生意）中環都係同一個老闆。」
在繁忙的中環，兩大回收電話檔分別位於戲院里及皇后大道中的十字路口。
據記者連日觀察，位於戲院里的檔口每日中午十二時開檔，迎接中環午飯人潮，到晚上七時收檔。
記者估計，該檔一天可以平均收到八至十部智能手機。
「每部機可以拆到九十蚊，計埋車費飯錢，坐足八粒鐘，唔算好好景。」該檔的檔員伸着腰向記者說。以每日收八部手機算，一天可以賺七百元左右，每月工作廿天，月薪一萬四千元。
他笑說：「總好過做保安，工作就係坐喺度，玩手機睇報紙睇街邊靚女又一日。」

收買佬收購到 iPhone後，會找人拿去蘋果專門店要求更換新機，記者所見他最後在國金心的專門店成功換取了一部新 iPhone。 

收工之後，收買佬會將手機盒、摺櫈等架生放入寫上「有用勿動」的後巷鐵箱。 

手機回收價動輒數千，因此收買佬要隨時準備大量現金，身邊經常攜帶數十張大額紙幣，生意好時，幕後老闆經常要派人送錢到檔口。

打 999試機

晚飯時間過後，中環人流減少，檔口亦夠鐘收工。檔員會收好摺櫈，把收到的手機放入隨身揹袋跟身；而近十個電話盒和摺櫈等開檔用品，記者跟蹤發現，他們會藏到附近後巷一個寫上「有用勿取」的鐵箱裝着，第二日開檔時再取。
記者見工作簡單，曾游說檔員阿昌介紹入行，他說其實入行「絕不簡單」。
「要識得檢查手機，打開熒光幕掃兩掃，然後拆開機背殼，檢查機身和有無更換零件痕跡，最重要是打電話試試通話功能。不過一般放售手機已經冇 sim卡，所以我們最方便梗係打９９９。」單是中環戲院里一檔，每日試機十次，打的都是報案熱線９９９。
阿昌說，要熟悉市場趨勢外，在街邊擺檔時處理客人，亦要有一手。「要識討價還價。」除了這個入行要求，他還表示，這一行行頭其實好窄，所有員工也必須由熟人介紹，獲得老闆信任。
「因為一個檔口金錢的上上落落，涉及大筆現金。」

收買佬坐在中環鬧市一整日，警察早已習以為常，記者見警員多次巡經都視若無睹。 

一名收買手機集團幕後老闆，拖着一喼收購回來的手機，到深圳華強北路遠望數碼城出貨。 

旺角人流密集，收買佬則採用人海戰術，每隔五步就開一檔，途人避無可避。

老細出更

「一個檔口每個月要有二、三十萬現金調動，每部機收返嚟要二、三千，一日十部都兩三萬喇，全部現金交易，老細大概一星期落嚟一次，一手交現金，一手收齊啲機，再搵人出貨。」阿昌說。
週一在中環戲院里開檔不久，一名平頭裝的中年男人便走近檔口，據知他正是收買集團的幕後老闆。
中年漢在口袋拿出一大疊現金交給檔員，叮囑幾句後，又步行到中環皇后大道中十字路口的檔口，吩咐下屬收機。阿昌說老闆每次來收機，還會向員工 update最新市場型號。
「邊啲機 out，邊幾款手機最 in，有時佢更加會指定要幾多部，好似近來 Samsung note 2喺大陸超搶手，老細就會話出價多五十蚊收，都要收多幾部。」阿昌說，由於大部分手機回收後送往大陸，而大陸手機市場十分緊貼香港，一旦回收機款過時，手機回收價立即下跌。

憎 Samsung愛 iPhone

「好似兩三個星期前， Samsung note仲可以用二千一百蚊收，但係三星最近又出咗新機， note即刻跌到落千五蚊，好快連有機都唔買。」另一回收檔的雄哥說，三星不停出新機，令他們一行生意淡泊。
「香港人追機追得快，但每逢 Samsung出新機，舊款機立即跌價，但新款機又未有人賣，就是我哋最艱苦的時候，我哋行內人稱為慘淡季。」雄哥埋怨：「真係俾三星玩死，好在中環仲有好多 iPhone收。」
行內人指， iPhone始終是市場上最穩定的收入。
「 iPhone出機慢，我哋通常都收，一來大陸多客要，二來有時會收到筍貨。」
所謂「筍貨」，原來就是一些手機收購檔口寫着「入水好壞照收」的 iPhone。
原來每當有人不小心將入了水壞機的 iPhone拿去回收檔出售時，他們會藉口以低至八百元收購，但就會立即通知老闆，派人將 iPhone拿到蘋果專門店，試圖要求換新機。
「好多香港人好×蠢，唔知 iPhone未滿保用期有壞包換的售後服務，我哋用八嚿水壞機換了一部五千幾的新機，大賺一筆！」記者當日便跟蹤到其中一名手下在中環檔口收到入水 iPhone後，立即跑到中環國金的專門店要求店員把壞機換新機。

收買手機集團除了中環外，深水埗也有據點，但收到的手機不是最熱門的款式，只能主攻鴨寮街市場。 

手機收買佬大呻這一行唔易做，要睇天做人，遇上時晴時雨的天氣，坐了一整天也沒生意，只好起身伸懶腰鬆一鬆。 

華強北路交貨

除了把收回的手機到專門店舊機呃新機；大部分手機，集合後都是經水貨客帶上大陸，最後的目的地是有手機城之稱、深圳華強北路的遠望數碼城。
數碼城一樓多是發售手機零件和配件，人流較少，二樓卻截然不同，有五個籃球場大的場地擠滿手機人群，買賣雙方互相出價競投。
每個小店鋪都貼上一份最新手機的報價表，跟股票市場一樣，會隨着供貨量及市場需求不停調整，同一款手機在一天之內可以有幾個價格上落。
其中一日，記者便跟蹤到幾名拖着行李喼的水貨客，喼內裝滿由香港收購回來的電話，過關去到華強北路。
一名不願表露身份的老闆向記者坦言：「收返來的 iPhone價格最穩陣，市場波幅不大，我通常都賣到高價；其他電話都有市場，近年 Samsung啲機都幾好。告訴你，這裡每年有逾億元人民幣成交，不只廣東，遠至北京、新疆、黑龍江的客人都會來呢度辦貨，所以唔好睇小我哋班街邊電話收貨佬。」

收買檔三宗罪

食環署職員呆站街邊無所事事，對擺在中環路口的手機收買檔口，不聞不問。 

大街小巷、行人專用區充斥着收購手機檔口，大律師陸偉雄表示，收買佬佔據街頭收購電話，明顯已經干犯了阻街罪。
同樣位處中環戲院里，○九年中曾有擦鞋匠被食環署控告阻街，引起社會關注，最後促成《小販（認可區）宣布》條例的通過，八名擦鞋匠獲得「擦鞋牌」，而時至今日，手機收買佬卻可在戲院里公然擺檔，警方和食環署卻視若無睹。
陸又指，手機收買其實亦可能涉嫌犯了處理贓物罪。
「佢有無問部電話點嚟，有無單據？如果明知部電話偷返嚟，無問清楚手提電話的來源，對來歷不明的手機隻眼開隻眼閉。收取電話後，再提供現金，就有機會涉嫌接老鼠貨。」陸說。
至於收買佬打 999測試電話功能，陸偉雄指，足以控告浪費警力罪。但他強調舉證比較困難，除非要便衣人員放蛇，再憑着 999熱線的電話錄音，當場人贓並獲。

撰文：陸勤
攝影：黃晴、文雄