Athena（左）的心情如天氣般變幻莫測，之前還嚷着要看指甲油，但到了商場後，卻突然扁嘴黑面，媽媽 Atty（右）唯有克制忍耐，了解一番。 

親壹親

青春期火併更年期

香港人遲婚、遲生育，捱大仔女去到青春期，父母往往已步入更年期。當反叛的青春期遇上𤷪𤺧的更年期，家庭風暴隨時一觸即發。性教育專家程翠雲（ Atty）與十三歲女兒晴希（ Athena）正處於這個尷尬階段，縱使 Atty受過專業訓練，但平日跟 Athena相處，依然迸出不少火花。不過， Atty並沒有氣餒，一直堅持「恩威並施」的管教原則，花足三年時間，終於逐漸把野蠻女收服！

一家三口本來感情甚佳，但隨着 Athena步入青春期，溫馨家庭驟起波瀾。 

社工出身的 Atty屬遲婚一族，三十五歲才結婚，四年後產女。屈指一算， Atty如今已五十有二，記者單刀直入，問她是否正步入更年期？ Atty聞言先是哈哈大笑，然後爽快答道︰「都係㗎，所以比較容易扯火，但撞正 Athena亦經歷緊青春期，佢都試過駁嘴駁得好緊要、態度好差，呢幾年對我哋家庭來講，絕對係一個風暴期。」
記者取笑身為專家的 Atty「能醫不自醫」，她卻反駁謂︰「專家都係人、專家都有情緒，尤其對住自己個女。但我亦會提醒家長、提醒自己，鬧還鬧、扯火還扯火，我哋鬧嘅，只能夠針對仔女唔適當嘅行為，例如我可以鬧 Athena未做好功課、未練完琴就走去玩，但就唔可以講『衰格』、『無腦』呢啲傷害別人自尊、人格嘅說話。」

家有青春期子女，的確惱人，但就未必要看成「世界末日」， Atty笑言︰「喺呢個時期，仔女睇父母唔順眼，父母睇仔女唔順眼，係好正常亦必然發生嘅事，就算 Athena由細到大同我兩公婆感情好好，都一樣係咁。所以做家長嘅，實在唔需要太過介懷。
「不過，如果你問我，我就寧願見到細路喺呢個時期有少少反叛，總好過對父母乜都 say yes。因為我接觸過唔少個案，即使去到三十幾歲，依然被父母高度介入佢哋嘅工作、生活，甚至婚姻之中，就係因為佢哋自細習慣乜都 say yes，我覺得咁樣更加唔健康。」

沉着應戰　恩威並施

話說回來， Athena的青春期也來得算早，還伴隨一個很特別的「儀式」。「 Athena間房原本貼滿米奇老鼠、公主嘅海報，但去到五年級某一日，佢突然撕走晒，換上偶像明星嘅海報，當刻我就意識到︰『青春期嚟喇！』當然，之後亦陸續出現其他行為問題，例如時間分配愈來愈差、駁嘴、貪靚，甚至心思思想拍拖。」
看着 Athena的轉變， Atty沉着應戰，並堅定地使出「恩威並施」這一招。「我唔贊成家長對仔女太過高壓、完全唔俾空間佢哋；但相反，我亦唔贊成家長一味只提供物質，任由仔女話事，完全無執行紀律嘅角色。」
她解釋，從兒童心理學來說，孩子需要呵護，亦需要權威，如果父母只得呵護，卻無法在他們心目中樹立權威的話，那孩子便未能獲得足夠的安全感。「所以簡而言之，就係要家長式管教，朋友式溝通！」

原則拒讓　潮流可議

Athena獲媽媽刻意安排參加不少群體活動，好讓她在成長歷程中有更多同行者，圖為 Athena隨葉氏兒童合唱團在希臘演出後攝。 

Atty說，對於誠信、責任感、禮貌等原則性問題，她管之甚嚴，並沒有半點讓步的餘地；相反，對於衣著打扮，她卻可以融入 Athena的世界，處之以寬。「年輕人扮型、扮潮，無非想喺朋友面前得到認同，咪由得佢囉，唔需要在外表上同佢嘈！當我在外表上冇俾壓力佢，佢自然唔會用呢樣嘢來同我鬥爭，反而肯同我傾、同我研究。
「舉例 Athena想染髮，我無一口拒絕，只係大家一齊研究吓點樣染得來又唔傷頭髮、又唔犯校規，結果我哋都認為暑假係最合適嘅時間，而且只限於染髮尾；又例如， Athena最近亦想穿多三個耳窿，包括一個穿喺耳骨。於是我就同佢講，穿多幾個唔係問題，但就唔好穿喺耳骨，因為怕會發炎，佢諗諗吓，最後都無搞咁多，只係穿多一個喺耳珠上面。」
即使許多父母聞之色變的拍拖問題， Atty一樣持開放態度。「我唔會鼓勵佢拍拖，但亦唔會妖魔化呢件事，因為大人愈妖魔化，細路就愈好奇、愈有興趣。不過，我會話俾 Athena知底線喺邊度，亂來會有乜嘢後果。」

贏得信任　勝券在握

訪問至此， Athena也排完舞回來了，談到這位專家媽媽，她半開玩笑說︰「我媽咪好極端㗎，佢可以好玩得，亦可以好惡。有時其他同學可以做嘅嘢，偏偏我媽咪就唔俾，我都會覺得唔開心。但媽咪成日話，佢話唔得就係唔得，佢有佢嘅理由，唔使同佢拗喎！」
記者問 Athena可有覺得媽媽煩？「煩㗎，尤其大聲鬧我嘅時候！以前我都會忍唔住駁佢嘴，但其實我都知佢返工好大壓力、好辛苦，所以而家我都盡量學習忍耐，由得佢鬧，等佢下咗啖氣先再同佢解釋囉。」
不過，講到 Atty潮媽的一面， Athena即面露歡顏，點頭認同，「我好多同學都笑我，點解鍾意男仔會同媽咪講？唓，我同媽咪乜都講，我哋之間無秘密嘅，我五年級已經同佢講男仔經啦，媽咪都無鬧我，況且我好 proud of佢係性教育專家，媽咪都有去我學校講 talk，佢可以教我點做。」 Athena答得頭頭是道，看來 Atty已修成正果。
Atty耍手擰頭，說還未敢鬆懈。「呢大半年， Athena可能真係大個咗、識諗咗，的確無之前咁反叛，但關鍵位仍然係拍拖，未來好視乎佢識到乜嘢男仔、點拍拖法。不過，只要 Athena信任我，肯同我講，我覺得自己已經贏咗一半，起碼我知佢發生乜嘢事，可以陪佢一齊行。」

話你知

兩性關係是很多父母都關心，卻又不知怎向子女講解的話題。家計會的灣仔總會，設有不少多媒體的互動遊戲和特色展品，向青少年提供性教育資訊，家長不妨帶同子女取經。
網址︰ http://www.famplan.org.hk 
keyword：「家計會賽馬會青 Zone」

專家教拆彈　調解五部曲

香港青年協會去年訪問六千多名初中生，其中接近一成學生，每日都會與父母發生至少一次衝突，而當衝突發生時，亦有一成七學生表示，會選擇跟父母死撐及駁嘴，反映兩代溝通欠妥善。
不想傷和氣？香港青年協會親子衝突調解中心單位主任兼註冊社工韓曄就以上網打機、金錢管理、衣著打扮等三大常見的衝突為例，教家長透過親子調解五部曲︰「及早意識衝突」、「恰當表達自己」、「聆聽對方」、「尋求解決方法」和「協議及執行」，逐一拆彈。

處境一：沉迷上網/打機

家長應與子女共同協議上網時間，可避免為此起衝突。 

很多年輕人都喜歡躲在房間上 facebook、打機，有時玩到連功課也不願做，為人父母的，難免扯火。其實當父母意識到自己有少許怒意時，就要「及早」表達出來，避免突然爆發，讓情緒失控。
家長可以說：「爸爸/媽媽睇到你近排玩電腦嘅時間多咗」、「爸爸/媽媽驚你亂上 facebook識到壞人」等等，但言詞間避免用指責的語氣。
與此同時，亦要「聆聽」子女的解釋，也嘗試從他們的角度，看理由是否充分、解釋是否合理。彼此陳述過後，父母不妨釋出善意，表示「爸爸/媽媽好錫你，唔想鬧你，大家有冇方法解決呢個問題？」又或者了解一下子女是否有其他興趣，可加以栽培，以減少他們上網的時間。
最後，父母可與子女共同訂立協議，例如︰「平日只可以上網玩一個鐘，放假先容許玩耐一啲」、「俾爸爸媽媽成為你 facebook嘅朋友」。

處境二：女兒衣著性感

青春期的少女甚注重外表，部分更愛作性感打扮，叫家長頭痛不已。 

吊帶背心、迷你裙是很多少女的心頭好，惟父母就未必受落。當第一次見到女兒這樣穿時，父母就要講出感受，以免孩子習慣成自然，但就切忌說她「肉酸」、「不三不四」，可選擇一些較中性的字眼，例如「前衞」、「性感」，並且具體指出自己的想法︰「呢個世界好多色狼，爸爸/媽媽擔心佢哋會傷害你」、「爸爸/媽媽覺得你著 T恤、牛仔褲更加靚女」等等。
同樣，家長亦要給予女兒適當的「抗辯」空間，以了解她這身打扮，是否要參加一些特別的活動？家長聽罷，大抵也心中有數，雙方就可以尋求共同接受的解決方法，並制訂長遠協議，例如在什麼情況下才容許這樣穿？如何做好防走光措施？

處境三：扭買智能手機

智能手機是學生的新寵兒，更是許多父母與子女爭執的導火線。 

智能手機的潮流席捲校園，學生哥也難免心思思想擁有一部，作為家長，好應該盡快表態。如果父母是有所顧慮的，就要講明理由，例如「爸爸/媽媽認為智能手機太貴」、「爸爸/媽媽擔心你沉迷 WhatsApp」等。
之後，就要聽聽孩子心底話，了解他/她想要智能手機的原因。孩子有否考慮誰付款？何時用？怎樣用？
如果孩子的「解決方法」能夠說服父母，下一步就是訂立君子協定。大家宜事先講清楚手機的主權誰屬？萬一子女有沉溺手機遊戲、 WhatsApp的行為，父母又有權執行哪些紀律呢？如有需要，不妨白紙黑字說明，避免日後爭拗。

話你知

香港青年協會親子衝突調解中心提供免費的調解服務，由社工幫助兩代心平氣和地溝通，對象是十至十八歲青少年及其家長。電話︰ 2402 9230，網址︰ pcmc.hkfyg.org.hk
keyword：「親子調解服務」

撰文：沈雅詩
攝影：陳健邦、吳超德