青雲路

大勢所趨　靠 facebook搵工

5、 6月是學期結束的時間，各畢業生要密謀尋找踏入社會的第一份工作，而網絡發展日漸成熟，猶如第二世界般影響眾人，搵工除了看報紙與求職網，原來借助 facebook或 LinkedIn等社交網站也可以找到出路，這次我們〈青雲路〉為搵工人士準備了網絡搵工小貼士，幫你一擊即中。

facebook玄機篇

Lika認為僱主在社交網站掘挖人才會愈來愈普遍，年輕人應盡早準備。 

用社交網站作為挖掘人才的途徑於歐美國家十分流行，但此風氣近年開始吹到香港，求職網站 CTgoodjobs的市務經理 Lika說︰「我哋喺 12年收集到嘅數據顯示，有 27%嘅僱主會睇求職者嘅 facebook、微博等社交網站，作為招聘嘅參考因素，但呢類多數係 I.T.公司。」

fb cover有幫助

專營電子行銷(eMarketing)的 Pacific Link iMedia，其創意總監 Lennon表示除了看求職者的面試表現外，社交網站會是參考因素，「我哋請唔同職位留意嘅地方會有唔同，好似請 designer，除咗會睇佢畀我哋嘅作品外，如果有 facebook我哋會睇埋佢個 cover同 profile picture有冇特色，有冇花心機去整過，呢啲位都會有分加。」

Lennon表示社交網站提供了一個不錯的平台，讓年輕人可以發揮自己的創意，應該加以善用。 

facebook的 Cover photos可顯示你的創意及 style。 

網上文字睇創意

平時在微博對生活事物的一些看法，有機會在眾多對手中突圍而出。 

很多人都愛在 facebook、 Twitter等發布一些想法或分享近照，這亦是僱主參考的地方， Lennon說︰「我哋請 copywriter主要會睇佢哋文字上嘅創意，我哋會留意求職者提供嘅 blog，睇吓文筆同風格會唔會啱我哋公司，同埋社交網站上嘅 album名稱會唔會改得特別或者得意，而唔係簡單咁幾年幾月幾日喺咩地方留影，呢啲都會增加請佢嘅機會。」

不要謾罵前僱主

如果在 facebook埋怨工作上的安排，會令僱主對你的印象分大減。 

很多人於社交網站都敢作敢言， Lika提醒最好不要時常發表謾罵前僱主及同事的內容，不然如果新僱主看到，其實會覺得應徵者沒有忠誠度。「好多僱主對呢啲嘢都好反感，所以減少呢啲言論。」

假 fb易被識穿

如果開假 facebook account，好易被發現。 Lennon說：「個 friend list得咁少朋友，我會估係臨時開嘅 account，可信性唔高。」 

為了求職，可能有人會想到開設新帳戶掩人耳目，但可能適得其反， Lennon笑說︰「我哋睇求職者 facebook都係想了解佢嘅日常生活及興趣，如果開假 account會好易發現，好似發布嘅話題及 friend list唔夠多等，其實最緊要平時做好自己。」

商界 facebook

Linkedin內會列明求職者的工作經驗，方便僱主找合適員工。 

被稱為商界 facebook的社交網站 LinkedIn，有不少大公司及獵頭公司會透過 LinkedIn搜尋人才，絕對是等「被獵頭」的最佳平台，當中大家不妨建立一個帳戶，打造好自己完整的 portfolio。 LinkedIn有關方面表示：「在整理自己嘅 portfolio時，可以選用自我介紹嘅角度，令 resume睇上嚟有人情味啲，而且不時發表一自己對生活事物嘅一啲睇法，都會增加僱主留意你嘅機會。」

面試見工篇

Dicky認為即使工作業務有關網絡，實際面試見工都非常重要，可考應徵者的直接反應。 

現時業務與 I.T.相關的公司比較傾向以社交網站為參考資訊，但說到底，面試表現佔的比重始終較大，網上討論區 Uwants創辦人 Dicky就話面試表現最重要，「雖然我哋業務主要環繞網絡，但唔會要求求職者畀社交網站嘅資料我哋睇，都係睇番面試表現，不過會問番有關於討論區嘅問題，好似平時去開咩討論區、近排討論區嘅熱門話題係咩等，從中了解佢哋對網絡嘅認識。」

減少不必要錯漏

Pokka Corporation(HK) Ltd.人力培訓及資源部經理 Sue年輕人見工要有準備，事前對工作空缺及公司背景做資料搜集，表現得有 heart，獲聘機會大增。 

在資訊科技公司以外，不少公司仍然以傳統方法作為請人準則，身為 Pokka Corporation(HK) Limited人力培訓及資源部經理的 Sue認為，雖然網上或雜誌有提供搵工貼士，但仍有不少年輕人於面試時犯下不必要的錯漏，「好似面試時想核對番個成績表正本，求職者竟然喺褲袋度拎張充滿摺痕，好似霉咗嘅紙出嚟，咁點會令人放心將公司嘅文件交喺佢手上？」

發問要有 heart

於面試完後， Sue通常會問求職者有否問題發問，「有啲會問病假要點請，遲到使唔使罰錢等，咁會留下一個斤斤計較嘅印象；其實求職者應該問吓個職位架構係點、有乜晉升機會等，咁先令人覺得求職者有心做份工，有上進嘅心態。」

注意聯絡人名稱

現時科技發展，電話及電郵取代書信成了主流的遠程交流工具，用電郵向僱主發送 CV（ curriculum vitae）比比皆是，但原來只看電話信箱留言與電郵名稱已可決定生死， Sue提醒︰「收到唔少求職電郵，聯絡人嘅名稱千奇百怪，好似『淚與夢』、『寂寞的心』等，見到已經唔想睇份 CV。有時打畀求職者飛去電話留言信箱，但開場白會係『喂﹗喂﹗玩你咋、有咩事留言啦！』作為僱主聽到咁嘅留言，會覺得求職者好似玩玩吓，冇興趣叫佢嚟 in。如果喺搵緊工嘅時間，都要執番好呢啲細節，留番好印象畀人。」

見工技巧網上尋

坊間有不少機構網站會教授一些求職技巧，如香港青年協會的青職網就有教面試時應如何打扮、履歷表撰寫技巧；而 Ctgoodjobs和 Recruit會有教求職策略錦囊，包含如何體面地回答僱主的刁鑽問題，多看這些資料，面對僱主就懂得如何見招拆招。

Ctgoodjobs會教授如何解答見工時遇到的困難問題，包括「請描述一次最困難的工作情況」。網址︰ http://www.ctgoodjobs.hk 

年輕人想學如何打扮及履歷表撰寫去面試，可到青職網，網站內會列明有關技巧。網址︰ http://jobnet.u21.hk

撰文：曾志恒
攝影：彭自維、黃家活
model： Anladia@GME
部分圖片由被訪者提供