常餐以外

食放題，就要物超所值！

連茶餐廳都要搞放題，就知任叫任食的吸引力有幾震撼。難得可以痛痛快快大吃大喝，不用擔心失去預算，享受唔使睇價錢的快感，當然過癮。但任食唔代表對味道冇要求，旺角放題店又平又多，講真有邊間你夠膽試？五六百蚊的酒店自助餐，要翻本不容易，計完數又未必值得。反而呢四間新上場的中價放題及自助餐，抵食兼有質素，錫住荷包同時可以食餐好。

去新酒店狂掃原隻膏蟹

最多人第一時間去海鮮吧，花甲王大隻飽滿，連虎蝦 size都夠巨型， refill得頻密。

中價的酒店自助餐已買少見少，大部分已經加價至五六百蚊一位，未食已覺肉赤。新開業的 MoMo Café，每位$388，價錢唔算最平，但以港人最愛的海鮮作主打，而且食足四個鐘，質素拍得住同集團的 JW Marriot，就唔同講法。
自助餐枱約 50呎長，由冷盤至熱盤一排過。前菜選擇少，勝在有多款意大利風乾火腿，即叫即刨，吃時仍然油潤甘香。刺身選擇大路，隔鄰的海鮮 counter長期人頭湧湧，每晚供應六至七款時令海鮮，最回本的英倫海峽膏蟹，足 500克一隻，原隻放在 counter任拎。隻隻爆膏，入口甘香鮮甜，蟹蓋最受歡迎，一 refill即成眾人搶吃目標。冰櫃內放滿現時時令的琵琶蝦，肉質爽彈，仲有長腳蟹、花甲王及週末推出的新鮮鮑魚，相當豐富。每次只擺放小量密密 refill，單單食海鮮都夠飽！
為了遷就附近家庭食客，熱盤以中菜選擇較多，燉湯火候足， Live station有即煮湯麵，亦有小量印度菜式。即燒扒類都是 MoMo Café強項，推介美國石燒牛扒，肉味重而腍身。曾於君悅酒店任總廚的 Larry，為了配搭出不同口味，特別花心思在醬汁上，如海鮮可配五款 Tabasco辣汁，扒類又可蘸自家調製的薰衣草蜂蜜芥末、朱古力芥末及松露芥末，味道突出又有新鮮感。甜品吧陣容未算太吸引，還是主攻海鮮更實際！

甜品吧選擇不算多，約八至十款，必吃即製的心太軟及香橙梳乎厘，需時十五分鐘，入口時仍然熱辣。

每晚有四五款凍肉，包括巴馬火腿、谷巴火腿、黑椒牛肉及芝士等，廚師不停即場刨。

石燒牛扒選用美國牛近橫膈膜位，肉味濃郁偏腍，燒至七成熟仍然有豐富肉汁，配濃郁的松露芥末最夾。

每晚有一款焗智利半殼生蠔，有菠菜芝士、煙肉及香橙麵豉輪流推出，醬汁惹味亦吃到蠔的鮮味。

廚師不會將扒燒好放在熱盤上，反而長期開着烤爐，有客人柯打才烤製。

自助餐枱全是 open kitchen，可以隨時問廚師推介，盤上分量不多，每十五至二十分鐘 refill。

MoMo Café
地址：沙田安平街 1號香港沙田萬怡酒店 2樓
電話： 3940 8788
供應時間： 6pm-10pm
價錢：星期一至四成人$388、小童$194
星期五至日及公眾假期成人$448、小童$224
泊車：消費滿$500可免費泊車兩小時

一壽司放題平盡銅鑼灣

近期最人氣放題，非一壽司料理莫屬，首次由迴轉壽司變身放題店，將銅鑼灣廣場 Monster Sushi及 Baby Café兩鋪位合併，面積過五千呎，成三百個座位，仍然座無虛席。五點半已見食客蜂擁入座，一個鐘未夠已坐滿一半，訂位更已爆到五月中。有一壽司作後盾，星期一至四每位$198，十點後仲有黑夜放題優惠，買三送一，除開每人只需$148。放題由入座起計兩小時，唔需要遷就時段限制，夠彈性。
一坐低，侍應立即送上刺身拼盤，俾客人邊食邊點菜，不會浪費時間等柯打，夠均真。食物總數近百款，十六款壽司是店子王牌，十款手卷之中，有葱金槍魚腩、海膽等貴價貨可選，貨源同本店一樣，沒有將貨就價，味道同一壽司冇分別，更細心地將飯分量減少，唔會質飽食客。刺身亦有十二款，包括松葉蟹棒、三文魚、迷你帆立貝等。食物種類多元化，燒物、鍋物都是本店食唔到的新菜式，必吃三款不同口味的茶碗蒸，選用日本雞蛋製成，有大大片的海膽、三文魚子及黑松露醬。爐端燒亦有驚喜，用鐵板上菜，保持熱度，日本迷你甜番薯、有機粟米及菠蘿都是人氣推介。飲品全放在雪櫃內自取，汽水啤酒有多個品牌，連熱茶都有三款。另一亮點為自助雪糕機，自家製 froyo及雪糕有四種口味，廿幾款 topping任加，唔少人第一時間衝去食！比同類放題做得更有心，大把後生仔 like！

蒜香牛柳粒牛柳不會又乾又嚡，放入石鍋內上枱，蒜香樸鼻。

意大利香草燒羊架紐西蘭羊架用鐵板上，上枱時仍然冒煙，燒得香口 juicy不過韌。

Froyo及軟雪糕以自助形式供應，質感軟滑，有藍莓、哈密瓜味等，每日轉款， topping有台式爆爆珠、自家製 mochi等。

黑松露茶碗蒸（左）、海膽茶碗蒸（右）蒸蛋滑溜富蛋香，有一壽司散叫的質素，配料多，黑松露味夠濃香，海膽亦很鮮甜。

食客謝氏一家讚食物好食又抵食，不過偶爾有漏單情況。

每晚人山人海，環境比較嘈吵，早點預訂有機會坐到梳化卡位，否則可能要坐吧枱。

三文魚壽司

赤貝壽司

活海蝦壽司

火炙黑椒吞拿魚壽司

海鰻壽司

火炙左口魚邊壽司

一壽司料理
地址：銅鑼灣駱克道 463-483號銅鑼灣廣場二期地庫 1樓
電話： 2111 1231/ 2111 1232
供應時間： 5:30pm-12:30am
價錢：星期一至四成人$198、小童$128
星期五至日、公眾假期及前夕成人$228、小童$128
泊車：銅鑼灣廣場$28-$38/小時

靚裝好坐$10食波士頓龍蝦

將放題營造 fine dining格局，座位唔算逼，而且樓底夠高減少壓迫感，食得舒服。

幫襯日式放題，唔使旨意坐得舒服，大部分餐廳為提高成本效益，千方百計要將座位塞滿，要忍受逼爆兼嘈雜、如身在戰場的氣氛，就算幾平幾好食，過程都唔 enjoy。難得 Bubbles Fine Dining Buffet沒有這弊病，座位鬆動闊落，佔地二千呎只有約一百個座位。店鋪中央更設圓形開放式廚房，一邊設兩排梳化位，另一邊則靠住玻璃窗，夠開揚。高樓底配上柱狀吊燈，氣氛 grand得來舒適，如此格局實屬罕見。
放題有過百款食物選擇，主要分前菜、刺身、壽司、炸物及料理五大類，以壽司類較多，款式唔算多元化，鍾意大堆頭的可能會失望。曾於水車屋、壽司千賀工作的總廚余師傅稱：「我們重質不重量，大路及受歡迎的菜式，我們一定有。如刺身我們有十四款，包括油甘魚、甜蝦等， 1cm厚切，每日來貨保證新鮮。壽司飯用秋田小町米，客人最鍾意食配上芝士、蛋黃醬等創作火炙壽司。用五吋長大蝦做天婦羅，即叫即炸。我們特別講究賣相，出品好點先引得起食慾。」每枱必點波士頓龍蝦，開業優惠$10隻，兩人可點一份，龍蝦足 500克，有兩種味道揀，白烚不及芝士焗般濃香，龍蝦膏香豐腴，蝦肉富彈性，抵！

波士頓龍蝦$10每兩人可柯打一隻，以芝士、蛋黃醬、蟹子、雞蛋等調成醬汁焗成，味道酸甜，龍蝦肉質爽彈，帶有小量蝦膏，入口甘香。

十四款刺身以帶子貝、甜蝦、油甘魚最鮮甜，少見的榮螺、馬刀貝等都有。

食物加了不少裝飾，賣相不似一般放題店般求其，必吃燒日本番薯仔、燒雞翼、炸廣島蠔及天婦羅蝦。

除了普通汽水啤酒，可以每罐加$2飲多款韓國飲品。

食客陳生及同事由朋友介紹，第一次幫襯，滿意食物味道及上菜速度。

Bubbles Fine Dining Buffet
地址：尖沙咀金馬倫道 23-25A金馬倫廣場 2樓 A鋪
電話： 3746 9966
供應時間： 5:30pm-11pm
價錢： 5:30pm-7:30pm$198
7:30pm-9:30pm（星期一至四）$238
（星期五至日、公眾假期及前夕）$268
9:30pm-11pm$168
小童及長者$148（所有時段）
泊車： The One$27-$29/小時

工業區長腳蟹日式火鍋

自助餐枱很細，每次推出十多款食物，但每次 refill不同，一有 refill就會敲鐘提醒食客。

放題店多到進駐工業區！位於葵涌工廠大廈的和藏 Shabu Shabu放題，暫時只容納約五十人，負責人彭生稱：「我們本來做婚宴及會所到會服務，班底都是酒店出身，識得不少食材供應商，加上位於工業大廈慳到鋪租，可以選用更好的食材，希望個個客人食到捧住個肚走！」
三款 shabu shabu放題套餐，最平的安格斯牛肉連自助餐只需每位$168，最貴的$2,180套餐，雖然有 A5級鹿兒島和牛，但不太划算。最多人點$228餐，包任食 Prime級牛肉及自助餐，另送四道私房海鮮料理。牛肉選用三角肩位，脂肪均勻，全部無限量任食，限時 90分鐘。唔好咁快填飽肚，還有逐位上的私房料理，每日款式不同，以海鮮為主，視乎當日街市貨，鮑魚、帶子、焗蠔及鐵板虎蝦等輪流推出。
自助吧枱看似唔多食物，部分是冬菇、響鈴等火鍋配料，原來每次都 refill不同款式，有原隻烤豬髀、蒸魚等共三十多款，刺身如牡丹蝦、海膽等都不停供應，吃至尾段會推出甜品及水果，$228餐仲送多杯 Häagen Dazs雪糕。當中以堆積如山的松葉蟹腳最吸引，每日最少供應六十公斤！取自兩三磅的加拿大松葉蟹，不經浸水保持鮮味，每人至少拎十幾隻慢慢拆。 Booking已去到七月，彭生稱遲些更會擴張至一百位，食客唔使排咁耐。

刺身有十款，勝過不少酒店，連貴價的牡丹蝦、海膽、甜蝦及帶子都無限量供應。

只有一款湯底，豬骨湯底熬足四小時，很清甜，配上油花均勻的 Prime級牛肉，切得厚薄適中。

王小姐及家人覺得勁抵食，熟食味道好，但 90分鐘太短，食得太趕！

北海道帶子用上湯浸過，加牛油煎香，質感香滑鮮甜。（私房料理）

蒸至腍身的九孔鮑魚，軟滑不過老，用蒸魚豉油調味，味道香甜。（私房料理）

大虎蝦夠大隻，番茄醬酸香醒胃，蝦肉爽彈。（私房料理）