包偉強八十年代已迷上氣槍，五年前更辭去上市公司高層職位，開設室內 war game場。創業後已許久沒穿西裝的他，為拍照才匆匆換上，自言反而有點不習慣。 

壹盤生意

前上市公司高層 包偉強 揸槍搵食 室內 war game場

創業並非年輕人專利。在製衣業打滾三十多年的包偉強（ Simon），曾是上市公司華鼎控股（ 3398）旗下時裝公司的董事總經理，年薪以百萬計，生活無憂。五年前，年近半百的他決定辭職創業，將興趣發展成生意，在觀塘的工廈開設室內 war game場——城市獵人。
做慣千萬大刁兼持有 MBA學位，包偉強初時自信十足，誰知做落先知中伏，公司蝕足兩年，惟有放下身段，重新學習。薑是老的辣，經過搬鋪及連串開源節流改革下，終於站穩陣腳，上月盈利達十二萬元。回想創業五年的苦與樂， Simon坦言：「四十八歲去追創業夢，一啲都唔遲，能夠捨棄才可真正擁有。」

一開口，便知道 Simon是個商界老手，說話條理清晰，對生意的發展掌握透徹，分析時喜歡列點，為記者省回不少工夫。創業前，他管理一間有二千名員工的時裝公司，每日都西裝筆挺，日夜顛倒地歐美中港到處飛傾生意；如今，一身 T恤、牛仔褲，每日在廣播道的家及觀塘工業大廈之間來回跑。以前接觸的都是大公司高層，關係對等，說起話來「快而準」；如今每日都要「服務」不同年齡層的客人，他直言初時「不習慣」，但不得不放下身段，現已收放自如。
一切改變得來不易。城市獵人原開在觀塘偉業街的工廈內， Simon一口氣租下三層，約三萬呎。不過生意慘淡，經常出現冷場。「當時諗得好簡單，就係租場俾人打 war game，五至十月旺季時，每月都有幾萬蚊賺，但一到冬天就蝕入肉，連租都交唔起，人工都蝕埋。我喺 Roadshow、屋邨大堂嘅電視賣廣告，但成效唔大。」 Simon回憶道。蝕到怕，他才知道單靠出租場地予玩家不能「維皮」，一定要搞些「人冇我有」的服務或噱頭，就如做成衣就要做品牌一樣。於是，他重新審視整個行業的情況，度出一連串開源節流的方案。

裝備租借每套收費七十元，包括勞工手套、保護面罩及電動氣槍一支配彈匣和無限供應 BB彈。 

城市獵人位於觀塘偉業街美嘉大廈，面積約三萬二千呎，月租十萬。 Simon一開始已選址市區，貪其交通方便。 

上週六，有教會租場搞親子活動，小朋友都表現專注及興奮。有父親初時擔心兒子被 BB彈射傷，但活動結束後就大呼好玩，更指可鍛鍊兒子紀律。

親子概念殺食

為了擴闊顧客層， Simon兩年前推出親子班，「四歲以上，拎到槍就可以玩㗎啦。」 Simon為此買入一批小童用的裝備，包括兒童面罩及氣槍，又開放場地作生日派對。記者忍不住問﹕「咁細個就教佢玩槍？」 Simon卻有自己一套﹕「以前成日見到啲客帶埋仔女來，自己玩，仔女就留喺休息室。我覺得小朋友玩 war game，可以學到紀律同正確使用槍械嘅知識。」上週六，有個教會便租場搞親子活動，在場父親大多是講英文的華人，帶隊的牧師 Andrew表示﹕「我哋經常會搞親子活動，有教友提議 war game，我上網搵到呢度。」同一天，還有一班讀國際學校的童軍來玩。 Simon笑說﹕「推出以來反應好好，佔生意總額約兩成。」
另外， Simon亦推出專為公司客度身訂造的 Team-building活動，人均收費由二百至四百元不等。「都好受歡迎，佔三成嘅收入， AIA､政府機電工程署都來過，最大規模係聖安娜嗰次，有成一百八十人參加，要分開三次搞。」城市獵人還設有國際實用射擊課程及實用射擊活動訓練。「呢啲課程唔賺錢，但學員上完堂就要搵地方練習，又可以介紹朋友或公司客來。」 Simon說。

上星期四晚，約十名 OL放工後來參加射擊課程，學員都不約而同道：「揸槍好型。」 

由於客人都是團隊形式租場，場內特意設置三個獨立休憩區，供客人擺放物品、商討作戰策略及休息。 

三個場景　彈性吸客

一○年，舊址租約到期，城市獵人搬到同一條街的美嘉工業大廈，由三層變成一層，總面積相若。八十年代已迷上氣槍活動的 Simon深明玩家貪新鮮的心態，將場地劃分成三個場景，包括中東戰場、森林及辦公室迷宮，另設三個獨立休憩區。 Simon表示﹕「獨立休憩區可以提供私人空間，超過三十人就可以包場，玩晒三個場。」
由於按人頭收費，換言之，愈多人租用場地，收入愈多。有些室內 war game場只有一個場景，為回本，限定入場最低人數為十五人，而城市獵人於非繁忙時段的最低入場人數為六人，其他時段為十人， Simon解釋﹕「香港人工作忙，好難可以夾到一大班人一齊玩，降低成團人數可以服務多啲客。」

節省成本　只請兼職

公司除了 Simon及一名文員外，其他都是兼職，接近二十位。「室內 war game場嘅生意額唔穩定，又有旺淡季之分，請一個全職，除咗人工，仲要供強積金，生意差時好易入不敷支，請兼職可以更靈活。」 Simon會邀請有經驗的客人做兼職導師。「一來佢哋當係娛樂，二來唔使點 train已了解客人嘅需要。」 Simon說。
為保持新鮮感，場景須不時轉變，但動輒需要幾萬元。為此， Simon特地在場裡裝上不同的燈光，並把設置都加上容易移動的木板，方便轉變位置，以減少添置設施的開支，「初玩者鍾意開晒光管來打，進階者就鍾意開顏色燈。設施容易移動，參加者可以按自己喜好去擺置，例如將梳化打直變成新障礙物。」

為理想棄高薪

公司雖然賺錢，但一年加起來仍比不上他打工時的年薪， Simon卻十分享受﹕「打咗咁多年工，終於可以做自己嘢，好難得。」做製衣業出身的他，曾幫利豐打工，○二年加入一間中資成衣製造公司，「當時香港辦公室得十個人，我由開荒牛做到公司上市。」 Simon驕傲道。○八年，他攻讀 MBA時，突然有創業念頭﹕「喺製造業咁多年，要試嘅嘢都試過，不如趁仲有體力，經濟上又支持到，試吓創業，做自己喜歡的事，亦當係 MBA嘅一門功課。」他指以前的經驗，最有幫助是在品牌經營上，「公司名係改自八、九十年代好出名嘅日本漫畫《城市獵人》，呢個名喺香港無註冊，仲可以比喻市區嘅 war game場。」 Simon老練地說，如今，所有客人仍由他親自接洽。「因為一個電話可能就傾到一單生意返來，又或者將一單小生意變成大生意，呢啲嘢都是親力親為好啲。」 Simon笑指，手機廿四小時候命，所以半夜都會收到訂場電話。訪問期間，電話響個不停，他苦笑﹕「作息唔定時，胃痛問題愈來愈嚴重，上星期先痛咗成晚，自己生意，冇計。」

城市獵人的場景及裝修都由 Simon一手設計及裝設，每次客人離開後，他都要落場將道具收拾整齊。 

場內有 war game裝備出售，保護面罩售$200。 

室內 war game場須知

根據香港法例第 238章《火器及彈藥條例》，管有軍火及彈藥須持有牌照，除一般的槍械外，槍口能量超過 2焦耳的氣槍，甚至粉末的煙霧劑、魚叉等，亦包括在條例內受到監管，違例者可被判處最高罰款 10萬元和監禁 14年。如果 war game場使用的氣槍射擊能量不超過 2焦耳，便只須領取商業登記。

開業資料
（ 07/2008）

租金　$400,000*
裝修　$300,000
器材　$50,000
雜項　$20,000
總投資　$770,000
*三個月按金一個月上期

營運資料
（ 4/2013）

營業額　$300,000
租金　$100,000
人工　$40,000
雜項　$40,000
盈利　$120,000
十位兼職及一位全職，包老闆人工

壹週刊 fans club

即上「壹週刊 fans club」睇片！

撰文：黃秋娥
攝影：廖健昌