Angsana Laguna Resort內有人工湖，住客可以隨意玩風帆。重點是，免費。 

登機證

 旅行 旅遊 resort show　布吉

布吉，作為香港人最常到的度假勝地，未必至愛，但當你得幾日假唔想使個天文數字最好唔使點用腦 plan行程，你又往往貪佢航班密使費唔貴又熟路，再去多一次。
於是，揀間好 resort變得很重要。好在，即使發展已久，布吉依然不斷更新，繼續提供新鮮感。揀來三間新開布吉 resort，三種截然不同個性，各位可以自行對號入座。

第一間給好動的人

Angsana Laguna Phuket

Resort設於沙灘邊，沙灘有大象策騎玩意。$130騎 15分鐘，$183騎 25分鐘。近排香港人愛大，鴨仔要大，屎要大，呢隻象應該受歡迎。 

自助早餐是一般水平，得意在派出吉祥物大象來餐廳門口迎賓。連吃個早餐都要加啲玩樂元素。 

不規則泳池佔地甚廣，唔識形容，你不如自己睇睇隔籬幅圖，就知泳池什麼形狀。有乜好處？有部分位置布置成人工沙灘，有部分位置設酒吧區，有得揀！

免費風帆玩轉人工湖

如果預咗要玩到癲蒲到嘔嘅，唔使講嘢，首選 Angsana Laguna Phuket。
Resort位於 Laguna區，自成一國，由一個人工湖貫穿區上眾多 resort，非一般布吉風味。唔好睇小個人工湖，除咗負責美化環境，新開的 Angsana最叻運用，住客可以免費在人工湖上玩風帆，或者划獨木舟，等你唔使次次去 resort齋游水咁寡。你驚？有工作人員幫你開船；你有信心？自己搞掂晒亦得。由於有小艇會定時定候似觀光船般穿梭不同 resort，人工湖湖面其實不如想像般平靜，揸揸吓，都咪話唔危險。
地方夠大，有成 409間房提供，單單餐廳都有七間，一睇就知係啱一家大細足不出戶嗰隻。俾一家大細去，個人認為，只有一件事，係父母心底裡最關注的：如何照顧到子女之餘，夫婦二人又有私人空間處理私人事務？就係勝在房夠多，設有不同款式，強烈推介 2 bedroom loft，似港式三層村屋，地下係廳，上兩層係兩間房，最多可容納一家六口，天台仲係私人地方俾你曬太陽，完全係我將來生咗仔後最理想的生活模式。關了房門，隔音不錯的，讚！

划獨木舟也是免費，容易過控制風帆好多。 

Resort外的森林有 ATV租借，$392揸 40分鐘。賣點係個員工好靚仔喎……

又影 spa？以為間間 spa大同小異，無乜新意？ Angsana Spa諗到 Fruit Delight，用生果包括橙、蘋果、蘿蔔來磨砂。仲有可可豆、蜜糖芝麻、芒果、木瓜、米等選擇。 30分鐘磨砂加 60分鐘按摩，$943。 

2 bedroom loft，有條樓梯俾小朋友跑吓跑吓，好開心，但房間比較狹窄，有得必有失。 

普通 Angsana suite，客廳大得多，對人工湖景，最多可住六人。

玩到半夜池畔派對

好啦，解決了子女的需要，咁唔肯認老的父母呢？或者年過十六其實見識比父母更淵博的子女呢？ Angsana Laguna Phuket有間 beach club叫 XANA，每個月會定期請來國際知名 DJ來主持 poolside party，住客免費入場，亦歡迎街外客以$240購票。
你可能會問，香港都有酒店搞池畔派對啦，使唔使去布吉嗰個呀？布吉呢個至少有幾項優勢：一、平，買杯香檳都不過$100，喺香港，貴一倍算少。 OK，呢個理由唔算太充分，但香港的池畔派對基於噪音管制，一過十二點就散 band，極度無癮，呢度唔同，點嘈都嘈唔到住客房間，有排玩！可惜，入去蒲的，大部分老蘭 look，無乜人著泳衣，而唔著泳衣又唔俾落水，結果搞到泳池非常冷清，人人逼去舞池，唔落泳池，美中不足。
浪費咗浸在水中央跳舞飲酒的大好良機呀！

XANA位於沙灘，在燈光效果下，氣氛其實不錯，如果將舞池放近泳池，讓賓客玩得更盡更放，效果一定更瘋狂。 

請來英國名 DJ Paul Oakenfold打碟，最近佢仲幫雪兒（ Cher）新碟寫歌，堅㗎！但係香港 W Hotel都唔弱，用靚女 DJ Scarlett Etienne進駐 5月 18的池畔派對。 


同香港的更大分別：有放煙花環節，你得唔得？ 

玩到凌晨兩點左右，開始出現呢種情況，算慢熱。 

Angsana Laguna Phuket

地址︰ 10 Moo 4 Srisoonthorn Road, Phuket 83110.
電話︰+66（ 0） 76 324 101
房價︰$1,687起/晚
網址︰ http://www.angsana.com/en/phuket 

第二間給愛潮的人

Pullman Phuket
Arcadia Naithon Beach

攝影師久經戰陣，都忍唔住話呢個 resort係非一般有型。池底圖案似 Paul Smith間條吖嘛！人都係虛榮的。 

太陽傘都不落俗套地黑白配。 

呢個係咪 Paul Smith泳池？

去過曼谷的，很多也入住 Pullman酒店，一來交通便利，二來自助早餐又多又好食，三來裝修夠型格，唔鋪張唔花巧但有品味。
品牌最近在布吉插旗，由 hotel轉為 resort，基本風格依舊不變。一入去，行過木地板，見到大大個彷彿 Paul Smith經典間條圖案的泳池，已經覺得與別不同。無論行人通道、餐廳內、房間中，大小擺設均行型格路線，實用唔實用並非考慮要素，最緊要靚。鼎鼎大名的自助早餐，味道保持曼谷店的水準，而賣相和餐具來得更精緻。 Resort位於機場附近，僅十分鐘車程，即係離芭東海灘成粒鐘車程，暫時尚在試業階段，好多設施尚在興建中，人流不算多，亦未見國內同胞進駐，十分寧靜。何況， resort位於山崖，由房間去餐廳去泳池，行出行入其實要上落樓梯唔算太方便，唔啱老人家亦唔太啱小朋友。啱乜？聽唔到小朋友喊聲，啱晒度蜜月囉。

自助早餐是高檔次的食物布置，件件的的骰骰，而環境設計亦甚有心思，果然是非一般布吉 resort。 





細心位還包括棄用千篇一律的 buggy作交通工具，改為買入布吉市面上的篤篤（ Tuk Tuk）改裝，立即成為拍攝點。

Pullman Phuket Arcadia Naithon Beach

地址︰ 22/2 Moo 4 Tambon Saku, Amphur Talang, Phuket 83110.
電話︰+66（ 0） 76 303 299
房價︰$1,089起/晚（另新開業優惠住兩晚送第三晚$807起/晚）
網址︰ http://www.pullmanphuketarcadia.com 

房款不算多，由最細的 Deluxe到最大的 Pool Villas，布置也大同小異。我最欣賞啲得意小擺設，呢啲先令人有家的感覺。 



呢杯，係咖啡，試管內的，係糖和奶，$52，買造型都抵。 

第三間給去芭東的人

Kalima Resort& Spa, Phuket

一去旅遊，係要做少少無聊嘢，例如在酒店房模仿手握芭東沙灘建築物，其實，我都係想話間 resort好近市中心啫！ 

近市中心的最新選擇

去布吉，有啲人主力住間靚 resort，匿埋入面就夠，當自己去了馬爾代夫也可以。但不要忘記，布吉的芭東沙灘，即使水質不算適合游泳，但長街的食店，按摩，甚至購物點，從來是港人至愛。
人是矛盾動物，住在芭東沙灘的話，一來嘈到拆天，二來酒店又殘又舊；新開大型 resort的選址大部分都會遠離繁囂，況且芭東本身都無乜位俾人再大興土木啦！兩者取其輕， Kalima Resort& Spa, Phuket算係既方便又經濟又新淨仲有少少設施的不錯選擇，離芭東沙灘只有約十分鐘車程，搭的士唔講價$80，包保無芭東區普遍酒店必定有嘅酸臭味，仲給你一個 infinity pool。特色係欠奉㗎，但講明方便你去市中心，你都出咗街，間 resort，要咁多特色做乜？

普通雙人房，算闊落，有海景。 

Infinity pool，但池底呈綠色，令人無啦啦對水質有戒心。 

頂樓是露天餐廳，意料之外有好嘢食，推介最前嗰碟泰式炒河 Pad Thai，$83，係我在布吉多日食過八碟 Pad Thai中，最有風味又最具賣相的一碟。

Kalima Resort& Spa, Phuket

地址︰ 338/1 Prabaramee Road, Patong Beach, Kathu, Phuket 83150.
電話︰+66（ 0） 76 358 999
房價︰半價$1,000起/晚
網址︰ http://www.kalimaresort.com 

其他新選擇

Avista Hideway Resort and Spa, Phuket
芭東海灘附近山上的五星豪華酒店，摩登泰式設計，房間面積起碼 540呎，酒店有三個泳池。
房價︰$1,164起/晚
網址： http://www.hideaway.avistahotelsandresorts.com 

Thanyapura Sports Hotel
離機場 15分鐘車程， Thanyapura Sports Club佔地 23公頃，有大量運動設施如足球場、沙灘排球等等，酒店新開張，可用會所設施。
房價：$855起/晚
網址： http://www.thanyapura.com/tslc/sports-hotel 

Regent Phuket Cape Panwa
位於布吉南端，較清靜，由集團 Regent開設，所有房間都有私家向海露台，新開期間提早預訂有特價。
房價：$1,578起/晚
網址： http://www.regenthotels.com/en/phuket 

旅遊資料

簽證：持特區護照或 BN（ O）均毋須簽證。
機票：港龍及泰國航空均有直航前往布吉，機程約 3.5小時。
貨幣：泰銖 Baht（ THB）， HK$1約兌 THB3.8。（文中價錢以此計算）
時差︰比香港慢 1小時。

撰文：方俊傑
攝影：陳偉傑
模特兒： Ceci Ng