close
同你吟一吟
洪天明湊仔不求人
今年初榮升做老豆嘅洪天明，俾老婆周家蔚大讚係好爸爸，只要人在香港，一定幫手湊仔。冇作大！早排《壹》仔响 Elements撞見一家三口行街，天明做車手幫推 BB車，另一隻手就拖實老婆，大小都照顧到。
天明湊仔不求人，但唔係個個都似周家蔚咁幸福，有個老公肯幫輕吓，湊 B出街，好多時都要帶埋工人幫手。
佗緊第二胎嘅 Rosanne，上個禮拜二（四月三十日）帶住囝囝同外傭去中環 City'super入貨。長胎不長肉，六月預產期嘅 Rosanne，就算百厭囝囝要扭抱，佗一個抱一個，佢一樣冇問題。
囝囝性格比較百厭，生女嘅谷祖琳就輕鬆得多。上星期三（五月一日），谷祖琳帶埋 B女行太古廣場，睇完 LV再睇 BB衫，外傭跟場幫手推車，囡囡劉心全程又冇扭又冇喊，幾 free呀！
一手推車，另一隻手攬實老婆，洪天明「駕駛」技術一流，囝囝 TJ咬住奶嘴瞓，冇醒過。 
Rosanne唔想囝囝 Dylan上鏡，用手掩住佢個嘴，不過食緊包包嘅 Dylan好八掛，雙眼一直望住鏡頭。 
買餸期間， Dylan扭完外傭抱再扭媽咪， Rosanne佗一個抱一個，掂！
B女好奇，掛住四圍望，谷祖琳自由行。 
媽咪入咗去 LV，劉心發牙痕咬 BB車扶手，外傭叫唔好，佢即刻收口。
撰文︰八珍
全站熱搜
留言列表
