左起： Andy（ 32歲）、申彗星（ 33歲）、 Junjin（ 32歲）、李玟雨（ 33歲）、 Eric隊長（ 34歲）、金烱完（ 33歲） 

亞熱帶

六神合體　神話現香港

韓流盛世， Superjunior、 Big Bang、 CNBLUE等 K-pop組合熱爆全球。如果話最經典係 6人組合—神話，肯定冇人反對。
神話由 Eric、彗星、 Junjin、玟雨、烱完及 Andy組成，佢哋以強勁舞蹈聞名，係韓流跳舞組合嘅始祖，最難得 98年出道至今，整整 15年，冇換人、冇加減人，長情兼長壽。 03年神話跟 SM Entertainment約滿，成隊一齊閃人。 07年開始，因為成員輪流入伍服兵役，組合逼住停產，直到 11年，玟雨退埋役，六神再度合體，於是大條道理展開 15周年亞洲巡迴演唱會。 6月 8日，神話駕臨香港亞博啦，等足 15年，哈韓迷終於可以見到六神真身﹗

初出道時𡃁仔樣， 15年後，步入 3字頭，褪去青澀，增添成熟魅力，充滿男人味。 

神話屬於 SM Entertainment第四代組合，係東方神起、 SJ嘅師兄。 98年出道後，即成為韓國 K-pop之首。 03年，成員合約到期，因與公司傾唔掂數，結果成 team拉隊走人。雖然當年佢哋年紀唔大，隊長 Eric都只係得 24歲，家境富裕兼喺美國長大，頭腦比較精明，深知「神話」係佢哋食糊商標，於是 6個人幾乎賣埋底褲籌錢，以 21億韓圜（約港幣 1千 4百多萬）向 SM公司買番「神話」、成員彗星及 Junjin藝名使用權，仲要買走埋喺 SM公司所有專輯嘅版權。呢招簡直絕到無倫。

成員各司其職

離開公司後，為咗慳錢， 6個大男仔只係合租一間房，雖繼續以「神話」出席活動，但冇咗棵大樹罩住，始終比較辛苦。 07年到 10年，成員陸續入伍服兵役，組合有 4年真空期，其餘成員各自發展，好彩佢哋人氣平均，唔會出現「偏紅」，事關佢哋各司其職，冇衝突。好似 Eric同烱完拍劇為主， Junjin做綜藝節目主持，玟雨同彗星則負責唱作，而 Andy則主力做幕後製作。

喺《神話放送》入面，成員齊齊扮鬼扮馬搞笑，玟雨更玩到剝衫騷「肉」（右圖）。粉絲原來好易𠱁。 


03年脫離 SM後，為「生計」，隊長 Eric接拍劇集《新進社員》，飾演傻更更男孩，同佢斯文形象大相逕庭。

六神合體出擊

11年，組合終於得以齊人，決心再創「神話」，頭炮先搞咗個類似日本 SMAP嘅綜藝節目《神話放送》，一方面 keep人氣，另方面擸新粉絲。雖然韓國新組合來勢洶洶，但「神話」都力保聲勢。今次亞巡，佢哋唱新歌跳新舞，唔係食老本。不愧係神話中嘅神話。

金烱完喺 6號舉行嘅「百想藝術大賞電影部」憑電影《鐵線蟲》獲得最佳人氣獎。為今次回歸錦上添花。 

Andy近年致力幕後做老闆，近期冒起嘅新組合 Teen Top就係佢一手打造出嚟。 

巡演首爾場後慶功，隊長 Eric話亦係為亞巡預祝成功。 

一眾後輩如 SJ嘅神童（左一）、圭賢（左二）等，均視神話為榜樣，希望自己組合好似神話咁長情、長壽。 

網上有禮　有飛送

《 2013「神話」 15周年亞洲巡迴演唱會—香港站》
二人行門券（價值 2,560× 6套共 12張）
日期： 2013年 6月 8日（ 1場）
地點：香港亞洲國際博覽館

《忽然 1周》讀者現只須登上《 Sudden Club》網址： http://www.suddenclub.com 登記成為會員，便可參加網上有禮。答對問題，將答案遞送，即有機會免費獲贈《 2013「神話」 15周年亞洲巡迴演唱會—香港站》二人行門券。
*參加者請於 5月 23日晚上 7時後登入網址： http://www.suddenclub.com 便可參加網上有禮。
*詳情請參閱網上有禮條款及細則。
*每人只參加遊戲一次，違例者即被褫奪參加資格。
*如有任何爭議，《忽然 1周》保留最終之決議權。

問題：請指出「神話」出道於 19XX年？
A.1978年　 B.1999年
C.1998年　 D.1989年

撰文：姜培綺