句句金

句句金

葉翠翠近日再被指樣貌有變，佢坦言冇乜所謂：
無論點樣寫，直呀扁呀，其實我都冇乜感覺。
咁又係吖，佢個樣由選港姐變到依家，媽咪姐都開始覺得欠缺新意，無乜感覺。

最搞笑係翠翠仍堅稱自己純天然，無添加任何人工成分：
我過咗整容嘅年紀，入行 8年，個樣點會一樣，如果同 8年前一樣就驚喇。
弊在佢五官跟以前完全唔一樣，有啲仲要違反人體工學。如果咁都叫天然，媽咪姐都冇嘢好講。

即將推出唱片嘅李玟就坦白得多，早前佢喺新碟發布會，大方承認曾割雙眼皮，藝人靠臉吃飯，一點點小修，不能過分，不要不像自己！
講就講得容易，今日小修個鼻聽日小修對眼，整整下咪一樣面目全非！

王菲女兒童童遺傳咗媽咪嘅音樂天份，大有機會入行做歌手。不過繼父李亞鵬似乎唔多贊同：
可能一輩子被人家拿來跟你媽（王菲）比較，可能一輩子不能跳出這種比較。
做名人二代好難青出於藍，不過唔試過又點知唔會成功。後生仔有夢想，點都好過乜都唔試。

向來係紅地氈常客嘅范冰冰，今年出席康城影展慘被初次登場嘅張雨綺搶晒風頭，又被指着得唔夠中國風，佢接受訪問時表示不介意被批評：
我只能說做范冰冰很難，怎樣也會有人說一些話。
阿 Q啲咁諗，你夠知名度先俾人講啫，俾着一啲暗星，分分鐘除晒衫都冇人理。