cover face
Amber Xu 一個人的快樂
有時命運真係一啖砂糖一啖……
像 Amber當模 13年，憑着張曼玉與周迅混合版的外貌，在港極速發展，四大天王也合作過，前兩年，人仔好賺，將基地搬回上海；事業贏在起跑點。
今年頭，梁詠琪開經理人公司，首個羅致旗下的人，正是她。
當上藝人，不能再一副今朝有酒今朝醉的模樣了，首要改番個旺自己的名字，原名胥（音須）力文翹口難讀，「藍婷芝」應運而生；半路遇貴人，誤打誤撞為瓶頸現況帶來曙光。
當一切蓄勢待發之際，父母卻離婚！
事業、家庭難並存，原來是宿命。
難得，這個獨生女一副淡然，「唔通要匿埋屋企喊足一星期？」
也許，她慣了獨斷獨行，異地闖天下，夠強才夠撐，要知道，對人歡笑不難，背住別人，也能時刻心情愉悅，才最難。
Profile
藍婷芝
原名：胥力文
出生日期： 1985年 3月 26日（白羊座）
出生地：黑龍江齊齊哈爾
身高： 5呎 11吋
體重： 110磅
三圍： 32-23-34
語言：普通話、廣東話、上海話及英語。
學歷：山東省煙台七中畢業
簡歷： 12歲，往北京修讀模特兒課程。 01年，往上海發展，未滿 18歲已踏 Chanel台板，曾獲中國模特之星大賽十佳模特兒及最上鏡獎。 04年，來港發展。 13年，簽約成為梁詠琪旗下藝人。
主要作品：廣告，和記電訊、 SmarTone、上海灘、 Sony、 Canon、 P&G、 Nokia。時裝騷， Loewe、 Chanel、 Dior、 Fendi。 MV，張學友《講你知》、黎明《一言為定》。電影，《再說一次我愛你》及《父子》。
微博： http://www.weibo.com/amber 
89年媽咪教鋼琴，但太嚴，搞到 Amber冇興趣學，但就啟發了其表演慾。 
04年初來港，為上海灘拍了一輯廣告，驚為天人。 
05年 劉德華拍住天王劉德華演出《再說一次我愛你》。
一個人幾開心
事緣問起眼前這一位報稱單身多年的靚女，過年回鄉，面對家人催婚囉嗦幾句，如何招架呢？結果，一向心直口快的 Amber索性將家中近況和盤托出，我估，係佢想乘機搵人傾訴吧！
「前陣子，爸媽分開了……」
我呆一呆，個女 28歲才離婚，點解呀？「我唔理，自己從不過問父母事。」
不聞不問，是自我保護嗎？是不想崩潰於雙親面前嗎？ Amber反問：「唔通要匿埋屋企喊足一星期？」
她說，媽媽已捱過最難堪的時候，現在，盡量放鬆，思想充滿正能量，心態好得很。
「佢會突然打俾我，話想即刻去韓國去杭州去日本玩，佢周圍都有朋友，比我厲害。
「我安慰佢，『你睇，一個人幾開心，想去邊就去邊，一個人可以很快樂。』久而久之，佢漸漸接受埋我一個人嘅生活模式。其實，婆婆至最緊張我嫁唔嫁得出，依家，媽媽向婆婆解釋自己處境嘅同時，仲順便幫我擋埋呢份壓力㖭！咁咪幾好！哈哈哈！」
那麼，回復單身的媽媽，可有加重你的經濟壓力？
「佢係鋼琴老師，收入穩定，唔使我支援，況且，一向媽媽都唔理我俾唔俾家用。
「我倆好獨立，大家管好自己，亦習慣獨自去闖，我亦從來唔要家裡錢。」
現在， Amber女兼父職，閒時製造小驚喜，買點小禮物逗媽媽歡喜，情人節更訂快遞送上康乃馨一束，好讓老人家甜在心頭，母女相隔甚遠，心卻近。
「聽到佢『 wow』一聲，我就好滿足，佢好易𠱁，我送乜，佢都開心。」
高妹簽高妹
處理好家裡事，方可全心投入工作拼搏。刻下，國際天橋吹起中國熱，我戥 Amber唔抵，若遲一點出道，來得及分一杯羮，路就不一樣了。「外國唔一定好，工作都係隨緣。
「我第一次上台，演出上海時裝周，六場之中，有意國名牌 Ferré。第二次上台，已經係 Chanel，當時，中國女模唔係咁容易被國際牌子睇中。
「我遺傳咗媽媽正能量心態，對工作、人生有好大幫助，樣樣事都睇得開吧！」
雖說，一出道便接大牌騷，然而，唔係唔使捱，初來埗到，模特兒公司安排她入住宿舍， 500呎內劏出三間房，她獨佔一間板間房，已算厚待了。
「住板間房，成日聽到雜聲，尤其是客廳電視聲，而所有燈掣置於室外，室友總會唔小心開中我房燈，午夜夢迴，無啦啦着燈，嚇到我死。
「初來香港，超級忙碌，每朝七點起身，有一次，波蘭室友半夜兩點返宿舍，一入門口就大叫『 everybody』天呀！最終住咗半年，決定搬。」幸好她相識滿天下，可先寄居朋友家，再慢慢搵地方定下來。
工作幾年，賺到名氣，更賺到優質生活，早年，上海置業，生活無憂，決定脫離舊公司，回復自由身，自己打理工作。這個時候，遇上另一個老闆。
簽約梁詠琪， Amber說，覺得自己跟老闆娘很像。
「跟 Gigi同月同日生，大家都係白羊座，都係高妹。
「性格亦相似，每天好開心，好正面。」二人早於北京活動碰面，點頭之交，後再得朋友介紹正式認識。
「無意間知道 Gigi開公司，我 send自己 portfolio俾佢睇，佢有興趣，但冇要求我即刻簽約，話想俾大家空間去好好考慮一下，呢個係一個好負責任嘅做法，唔會話一見面就不斷話好鍾意你，馬上拿張合約要你簽，但簽完呢，將你放埋一邊……」現已簽半年，當作試用期，拍戲拍廣告兼備，即係話，她毋須放棄老本行。
「 Gigi會拿住我個廣告，逐點提醒，譬如甫士、角度等問題……我 OK，受重視感覺幾好。有一次，我哋要去北京參加活動，我由上海出發來不及借衫，佢喺香港幫我借咗 5套衫任揀，有個咁好嘅老闆，真係好彩！」
Amber's tips
Q：喜歡怎樣的牛仔褲？
A：鬆身一點，淺藍色容易襯。
Q：夏天 must have配飾是甚麼？
A：黑色 chunky手鈪，愈大愈好。
銀色泡泡袖 zip up jacket$4,350 pushBUTTON from Harvey Nichols淺灰色印藍花 skinny jeans$2,680 7 For All Mankind螢光綠色綴蝴蝶結厚底高踭鞋$8,980 Giuseppe Zanotti Design 
Amber Xu黑色皮背心$7,400 Alexander Wang from Lane Crawford透明網格膠背心$5,590 Fannie Schiavoni from Liger黑白蛇紋 skinny jeans$2,880 7 For All Mankind銀色皮手套 stylist's own
後記
世界上，有很多看似很強的人，骨子裡皆想被關注被照顧，大抵以下這件事令 Amber決定來港發展。
在上海期間，她試過發燒至肺炎，在醫院吊足一個月鹽水，一聽護士說：「這隻手已沒地方加針。」眼淚即滑下。
「上海冇乜朋友，又冇正式戶籍，有錢至有醫生睇，我覺得自己好可憐，不忘喊句『好想媽媽！』」
現在，有老闆、有同事，又有好友撐住，就算未搵到地方住，出句聲，一呼百應，個個爭住收留佢，如此，難怪加多兩錢肉緊搏殺也無後顧之憂了！
3.1 Phillip Lim中環國際金融中心 2083號鋪 2805 0688
7 For All Mankind銅鑼灣希慎廣場 316號鋪 2722 9677
Burberry中環歷山大廈 101A號鋪 2868 3511
Giuseppe Zanotti Design中環國際金融中心 2072-2073號鋪 2805 0890
Harvey Nichols中環置地廣場 3樓 3695 3302
Lane Crawford中環國際金融中心 3樓 2118 3376
Liger銅鑼灣百德新街 55號 A及 C地下 2503 5308
撰文：黃鑑江
形象： Annie Hung
攝影：郭賢興
化妝： Michelle Tong@D-mop Beauty by ND&Co.
髮型： Nick Lam@Orient4.com.hk
鳴謝： 7 For All Mankind
留言列表
