Organic Heirloom Tomatoes Salad$138簡單以復古番茄、水牛芝士和火箭菜撈香草醬，番茄皮較厚，味道清新。 

試食王

Joey師兄拍拖茶室

容祖兒、劉浩龍（師兄）拍拖愈來愈高調，接連俾人影到睇戲、撐枱腳食日本菜、歎下午茶。喺半山茶室邊食 tea邊拖手仔，坐足成個鐘， Joey放低晒戒備咁鬆懈，環境肯定好 relaxing，氣氛好陶醉吧？

天后拍拖地點，當然要踩場試試， Tea Saloon by another fine day四月底先開張，老闆娘是岳少前度陳浥萍，前年開的 another fine day，寫信俾自己送 tea set，已經是女生圈子熱話。新店選址卑利街，如果唔似 Joey有師兄做司機，亦唔搭的士，要由中環沿半山扶手電梯上到摩囉廟街，行足十幾分鐘先到。清靜的住宅區小街，附近幾乎冇其他鋪，咁僻，唔怪得吸引天后光臨。
全粉紫色加小花園的外表夠搶眼，入到鋪，用餐區繼續以粉紫色配古典圖案，加埋水晶燈，全場只有女客人，浪漫感覺滿到瀉。新店比舊鋪大，行入啲仲有似小偏廳一樣的梳化位，樓底雖然較矮，但望落舒服，在場幾位太太坐足兩三個鐘。 Joey吃的 tea set原來分 Ladies和 Gentlemen's兩種， Ladies的有六款小甜品加四款鹹點， Gentlemen's就以鹹食為主，只有一小件朱古力蛋糕作甜品，另加招牌玫瑰 scone。兩位$498，貴㗎！五星級酒店收費，半島 afternoon tea（$558/兩位），都只係貴少少，有名氣有 live band喎。

Full Monty All Day Breakfast Popover$168Popover（右上）似是空心的焗蛋糕布丁，即叫即焗熱辣香脆，炒蛋亦滑溜。 

Tea set中的伯爵茶 cupcake，約五毫米的 macaroon和鮮花點綴，玩到悶的 macaroon竟然仲做到驚喜。 

Afternoon Tea Set$498/2位兩位用可以叫 Ladies和 Gentlemen's各一份， filo撻和沙律特別好吃，主角 scone吃到玫瑰花瓣，花味頗重，相比之下，茶香較淡。

到少女侍應奉上餐具和食物就知原因。碟是英國設計師品牌 Katie Alice，三層架上食物的骰精緻，不是一般三文治、果撻等平凡貨色。樣靚，部分食物味道也出色，黑松露野菌 filo撻，層層撻皮薄脆得來毫不油膩，烏龍茶啫喱奶凍清香不過甜，就連 cupcake也綴上超迷你的 macaroon和紫蘿蘭，勁細緻。茶室亦供應午餐、沙律、 popover等分量較大的菜式。特別調配八種茶，例如 Earl Grey、高山烏龍加玫瑰等，入口茶味偏淡，不算驚喜。既然以 Tea Saloon為名，我期望更講究泡茶細節。不過，重要嗎？ Tea set幾好味都只是 bonus，客人坐幾個鐘傾偈的多，都係貪靚貪高貴，鍾意佢夠僻夠特別，就似 Joey歎 tea也志不在 tea吧？

室內粉色主調，放滿茶罐、茶具、鮮花等裝飾，冧女 style，全場九成九女客人，男士行入去，都幾尷尬。 

自家調配茶葉，茶罐亦以粉色為主，可以當小禮物送俾女友。 

老闆投資約二百萬開店，布置講究，不過全店以用餐枱櫈為主，只有店內最角落的位置坐得最舒服。

評分

食物：★★★★
服務：★★★ 1/2
環境：★★★★
抵食：★★★

Tea Saloon by another fine day
地址：中環半山卑利街 80-82號
電話： 2525 8257

試食王

喜歡外出用膳，也喜歡誠實，不相信飲食網站的所謂評分，也怕了所謂食家獲得優待後的意見，情願隱姓埋名，真金白銀，測試飲食雜誌飲食網頁捕捉不到的真實一面。

Art Basel吃掉藝術品

首屆香港巴塞爾藝術展將於 5月 23至 26日於會展舉行，文華扒房推出藝術餐單，總廚 Uwe Opocensky創出一系列菜式，造型和配搭都充滿驚喜。例如以鵝肝醬捏成梵高耳朵造型，玻璃碟上鋪上太陽花，客人面前再放一朵，視覺感官一同享受。濃郁的番茄湯以金寶湯罐盛載， Andy Warhol的瑪莉蓮夢露肖像，以黃椒、蘑菇和洋葱茸去畫成，菜式本身也是藝術品。

地址：中環干諾道中 5號香港文華東方酒店 1樓
電話： 2825 4004
收費：三道菜午餐$708/位、五道菜晚餐$1,588/位
供應日期︰即日至 5月 26日（送藝術展門券一張， 5月 26日晚餐除外）

限量日本老店和牛料理

壽喜燒套餐$1,580 

中環稻菊再次請來日本名店大廚作客席廚師，今次輪到始於 1895年的老店「人形町今半」，和食主廚以黑毛和牛炮製火鍋及料理菜式，選用松阪、神戶等牛肉，油花多肉質軟滑。供應五道菜壽喜燒套餐，由日本總店女侍應為客人烹煮 sukiyaki，午市及晚市各供應三十份。另有五道菜鐵板燒套餐，午市及晚市各供應十份。

地址：中環金融街 8號四季酒店 4樓
電話： 2805 0600
營業時間： 11:30am-3pm， 6pm-11pm
供應日期︰即日至 5月 25日

撰文、攝影：試食王