廿二歲嘅袁利亞，為咗供養細佬讀書同埋支付老豆醫藥費，先至從安徽到北京打工，家屬唔相信佢會自殺。（法新社圖片） 

壹路向北

美少女墮樓案　商場老闆大起底

上週，安徽少女袁利亞喺北京京溫服裝商城離奇墮樓身亡，有指佢死前可能喺商城內被保安強暴，但北京警方一開始就想火速 close file，唔肯公開閉路電視片段，查都唔查就斷言係自殺，拒絕立案。
翌日數千市民連同袁利亞嘅親戚朋友去商城門口示威，要求當局徹查真相。北京當局如臨大敵，出動大批武警到場，仲調動直升機喺人群上空盤旋，唔知仲以為係暴動。

袁利亞年僅廿二歲，從安徽去北京京溫服裝商城賣衫打工係為咗賺錢養家，供細佬讀書，同埋支付身患絕症嘅爸爸嘅醫藥費，而且今年又啱啱先訂親，佢屋企人都難以相信係自殺。
上個禮拜六，商城賠償死者家屬四十萬當揞口費，中央電視台新聞更加「獨家」披露兩段商城閉路電視片段，聲稱袁利亞死前得自己一個，冇人尾隨挾持。但係有眼利網友發現，片段入面袁利亞著嘅衫褲，同墮樓後現場著嘅衫褲完全唔同。而且兩段片段分別顯示時間係夜晚十點半左右袁利亞進入商城，同埋第二日清晨四點十九分墮樓前夕，其間六個鐘發生乜事，謎團仲未解開。

共青團後台

京溫服裝商城喺九十年代工商行政部門嘅脫鈎政策下，揀咗共青團旗下嘅匯凱集團接手，認定佢「具備一定的管理與經營能力」，結果百分之八十產權以招標形式出讓俾匯凱集團，另外百分之二十嘅產權由豐台政府控制。但係匯凱集團管理不善，到咗○二年幾乎破產，○三年仲被吊銷營業執照。商城八成股權隨即由另一間公司萬和控股獲得。
最得意嘅係，萬和控股嘅總裁鍾濤，正正就係匯凱集團嘅總裁兼董事長。鍾濤曾經係共青團中央實業發展部嘅助理部長，佢一手策劃嘅匯凱集團，能夠將國家資產左手交右手，變魔術咁變咗自己公司，睇怕現任宋慶齡基金會理事嘅鍾濤有強硬嘅後台，難怪當局要出動直升機幫佢趕人走啦！

政府搵中央電視台獨家播放商場閉路電視片段，但段片只得頭尾部分，中間發生乜嘢事，都係唔肯公開。 

京溫商城幕後老闆叫鍾濤，做過共青團，而家仲係宋慶齡基金會理事，後台強硬，難怪可以呼風喚雨。 

袁利亞於京溫商城墮樓身亡，當局唔肯立案調查，民眾認定政府隱瞞真相，結果數千市民聚集京溫商城請願，要求徹查，當局反而派出大批防暴警察同直升機去強硬回應。（美聯社圖片）

當二奶好過做紅三代

孔東梅嘅母親係毛澤東嘅長女李敏，父親係孔從洲將軍之子孔令華，出身世家望族。 

大陸財經雜誌《新財富》公布咗今年五百位中國富豪嘅名單，毛澤東外孫女孔東梅同埋老公陳東升，以五十億人仔身家打入第二百四十二位，孔於是被大陸同胞諷為全國二奶嘅學習榜樣。
四十一歲的孔東梅，九六年喺北京航空航天大學英美文學專業畢業，即刻加入泰康人壽保險度做，冇耐就搭上大佢十五年嘅創辦人兼董事長陳東升。但係戀情好快就俾元配陸昂發現，陳東升唯有送孔東梅去美國賓夕法尼亞大學讀書避風頭。○一年孔東梅海歸，繼續做陳東升嘅二奶，仲先後生咗一男兩女。直到前年年底，陳東升先至同陸昂離婚，舊年年底喺北京釣魚台國賓館擺酒迎娶二奶。
陳東升一手創辦經營嘉德國際拍賣、泰康人壽保險、宅急送等生意，而孔東梅本來係無乜人留意嘅紅三代，但搭上陳東升後，無端端可以去浸鹹水，然後就喺北京蒲點三里屯開咗間「菊香餐廳」，主打毛家菜。
打開紅色餐廳寫住「毛澤東選集」嘅餐牌，先嚟一句「 Revolution is not to entertain guests have a meal」。唔明唔緊要，因為 Time Out食評都話呢句「革命不是請客吃飯」嘅翻譯係「 a poor translation」（但係阿紅色公主明明美國返嚟……）。
最出名嘅菜式係秘製紅燒肉，八細塊盛惠一六八，有網友話：「一口二十大洋啊！」至於好唔好食，記者覺得 Time Out食評最中肯：「 If you don't expect much, you won't be disappointed.」。

福建村婦　俘虜防暴警

上個禮拜六，喺福建泉州嘅惠安縣，上百名村民包圍村委會，抗議貪官靜靜雞收地兼獨吞賠償，用地又將會興建勁污染嘅煉油廠。當局出動武警加防暴警察鎮壓，村民就合力用石頭還擊，最終十幾名村民被捕。
不過呢場抗爭出現一段大衞擊倒歌利亞式嘅插曲，一名全副裝備嘅防暴警察竟然被村民俘虜，仲被村婦用粗繩綁住雙手拖行遊街示眾，有村民更加順手打兩槌洩憤，牛高馬大得嚟青靚白淨嘅防暴哥哥一臉無奈。最尾雙方交換「人質」收場。（時事組）

由村民影嘅相可見，一名防暴警察被村婦用粗繩綁住雙手，拖行遊街示眾，行行吓仲被村民兜頭揼咗兩槌。