So Comment

新酒店探險　 COURTYARD BY MARRIOTT

乙-　新屎坑……
最鍾意新屎坑，尤其係酒店，必然去八吓，因為我常覺得去酒店食嘢係天下最抵。

朋友係沙田 Hyatt Regency長客，佢話沙田開咗間新酒店，要去八吓，咁我一定奉陪。用 google map去，容易到極，泊咗車喺街邊，都費事泊上 Hotel Lobby大門口。
當我一路駛車，一路睇間酒店喺邊時，酒店都非常當眼，絕對容易搵過沙田 Hyatt，一眼就望到頂樓好高樓底，燈光火着，我仲同朋友話，等陣上頂樓飲嘢，個景都應該唔錯。

二樓……

因為泊車喺街，一上扶手電梯，一出就係二樓的 momo cafe，三百幾蚊食 buffet，入去睇咗一個 round，乜鬼都有，有日本（唔多開胃），有麵檔，有印度（睇落唔錯），又有 BBQ，又有石板燒……除咗海鮮同日本嘢，其他睇落都好似唔錯，三百幾蚊可能都試得過。都有相當多年青人幫襯，又見佢哋好似食得好開心。我巡咗一圈冇逗留，因為預備上頂樓飲嘢，點知問門口的女仔，佢話，只有佢哋呢個 coffee shop同樓下有嘢飲。吓?!咁點解頂樓燈光火着呢？於是落樓下看過究竟。

Lobby……

頗有氣派，好高樓底，好多原色木， Spacious。黑衣人一見有人嚟立即走埋嚟絕不討厭地介紹間酒店， briefly睇咗 reception隔籬嘅 business centre同孤零零的酒吧。 Business centre啲位好靚，半圓木條，分三格，好有 privacy。冇研究個 bar因為太孤零零，都唔似個 bar。
於是問黑衣人頂樓係咪 lounge，係就係，不過係畀 club member同住客的。可能新開又可能因為係我，所以佢哋畀我同朋友上去睇。一入去，見到個景，好開胃！絕對唔 mind偶然駛車入嚟飲吓嘢。全層只得一個住客喺度飲啤酒，嘥晒！都唔明啲人點諗嘢，全間酒店最靚景就係頂樓，客人已經住咗入你 hotel，要用 facility要唔使錢飲嘢，咪去樓下個 bar囉，樓上梗係要收錢啦。我哋啲外來人竟然要踎喺樓下個孤零零 bar，然後一大個靚景冇人睇，神經病！
結果局住都要落 lobby個孤零零 bar飲嘢。要揀位都唔容易。 Bar對開係啲半瞓椅（好似沙灘椅）點解我同我朋友要半瞓喺個酒店大堂度傾偈呢？咁又局住坐 bar， Laam（嵐）係個 bartender，我哋係佢第三同第四個客，起初當然又係因為對住我啦，有點 nervous，我叫了杯 ginger drink，朋友叫了杯 watermelon fizz。有時我都會學吓做好人，我飲咗一啖，立即講畀阿 Laam聽好好飲呀，我說：「要對自己有信心吖嘛！」結果同阿嵐傾起上嚟，佢非常上進，自費去荷蘭讀酒店管理，覺得好多大佬對酒店認識唔夠深，所以一定要逼自己由低做起。

同阿嵐傾偈頗開心，忽然向上望，乜我哋好似喺一個裝修緊嘅屋度傾偈咁，上面的喉一條條又電氣喉，又電…… yuck！阿嵐話都試過反映，但冇用的！人微言輕的道理我哋明，但係有時間就係因為呢個細路日日都對住呢啲喉，佢覺得 uncomfortable所以出聲，我坐喺度十分鐘，已覺得啲喉好核突，完全唔襯間 hotel。這個角落錯晒！如果變返做 business centre，住客好似在 starbucks sofa咁飲吓嘢，食早餐， perfect！而家真係錯晒！
我係一個酒店精，去完 Ritz Carlton又係一間由頭到腳都冇樣啱嘅酒店。但 Courtyard by Marriott全個外形都笑容可掬，招呼周到的 staff都 OK，就係擺位錯晒，聽聞仲話要擺個自動彈嘅琴喺 lobby，錯上加錯，已經冇人氣，仲要咁 spooky！ no way！！

Lobby Lounge

地址：沙田安平街 1號
電話： 3940 8799

蘇施黃

資深電台人，天生異「口」，除了講嘢叻，食嘢同樣嘴刁，近年開咪、上電視做主持都不離教人食得精，吸引大批粉絲跟佢搵食。

撰文、攝影：蘇施黃